لشهر شتنبر؛ رحمات جديدة كل صباحعينة

خيبات الضن في العلاقات هما كتار، ولكن النعمة ديال الله هي كافية - في الحقيقة، هي كتكمل في الضعف ديالك.

هادي حقيقة خاصنا كلنا نواجهوها- حتّى واحد فينا عمّر ماكان عنده ولا علاقة وحدة في حياتنا مافيهاش خيبة الضن. حتّى وحد فينا ماحقّق أحلامه في العلاقات. هادشي علاش خاصنا نسوّلو: علاش علاقاتنا فيهم صعوبات؟ علاش خاصنا نكافحو باش نعيشو في سلام وانسجام مع الناس اللّي كنقولو أنّنا كنحبّوهم؟ علاش علاقاتنا فيهم بزّاف ديال الصراعات؟ علاش كنعيشو بزّاف ديال الغضب والجروح وقلّة الصبر؟ علاش؟

الجواب على هاد الأسئلة هو واضح وصعيب نقبلوه. علاقاتنا صعاب حيت حنا كلنا كنجيبو معانا في علاقاتنا حاجة كتدمّر هاد العلاقات. هاد الحاجة كيسمّيها الكتاب المقدس: الخطية. كتخلّينا الخطية منغمسين ومركزين في نفوسنا حيت هي كتخلّينا نعيشو لنفوسنا (قرا كورنتوس التانية 5: 15). الخطية كتخلّي كل واحد فينا يكون أناني بكل معنى الكلمة. كتخلّينا نكونو متطلبين كتر من نخدمو الناس لخرين، وهمجيين كتر من متسامحين، كندافعو على نفوسنا كتر من ضريفين، وكنتاقدو كتر من نتفهمو ونصبرو. أنا ونت ماخاصناش نتفاجئو من أن علاقاتنا عامرين بالمشاكل. نضرًا للوجود والقوة ديال الخطية اللّي كنجرّو معانا لعلاقاتنا، اللّي خاص يفاجئنا هو أن علاقاتنا مازال كتعيش!

واش الواقع القاسح ديال الخطية كيخلّيك تبغي تستسلم وتنساحب؟ واش كتخلّيك تشتاق لديك الجزيرة الأسطورية في وسط البحر فين تقدر تعيش بسلام بوحدك؟ ماخاصّكش تترعد، ماخاصّكش تخاف، وأكيد ماخاصّكش تفكّر باش تتخّلى على الرجاء في العلاقات اللّي نت فيهم دابا. علاش؟ حيت كاينة نعمة من أجل هاد الصراع. الرجاء في علاقاتك ماكاينش فيك أولا في الناس لخرين اللّي في ديك العلاقات. الرجاء موجود في شخص تالت غزا علاقاتك بالنعمة دياله. نت ماشي بوحدك في علاقاتك. هو معاك. هو فيك. هو من أجلك. هو كيقدّم ليك نعمة قادرة على المهمة حتّى ملّي نت ماتكونش قادر.

يعقوب 4 كيبدا بوحدة من مناقشات العهد الجديد اللّي صادقة بزّاف على الصراع في علاقاتنا. هاد المقطع صادق ونيشان على شنو كنواجهو كلنا وعلاش كنواجهوه، ولكن المقطع ماكيخلّيناش تمّا. في الوسط ديال هاد المقطع كاينة هاد العبارة الصغيرة اللّي كتغيّر كلشي: "وَلَكِنْ اللَّهْ كَيْنْعَمْ عْلِينَا بْزَّافْ." (أية 6). كاينة نعمة لكل لحضة مؤلمة. كاينة نعمة لكل مرّة كتدنب فيها أولا شي واحد كيدنب ضدّك. والنعمة اللّي نت كتاخد من أجل علاقاتك ماعمّر كتقاضا. ديما كاين كتر من هاد النعمة على شنو جاي مع الأيام. تقدر تعطي نفسك باش تحب، تسامح، تعتارف، تواجه، تّيق، وتّابر حتى ملّي تكون الأمور صعيبة، حيت هو "كَيْنْعَمْ عْلِينَا بْزَّافْ"

من أجل دراسة وتشجيع كتر: يعقوب 4: 1-10