لشهر شتنبر؛ رحمات جديدة كل صباحعينة

ربما اليوم بغيتي يسوع جنّي الأمنيات، اللّي غيحقّق كل أحلامك الدهبية. هو ماغيكونش قل من الملك المنجّي السامي ديالك.

الحياة كتدور على شكون وفين كتقلب على الشِّبع ديال القلب. الشكل والإتجاه ديال حياتك كيتحدّد من خلال داكشي اللّي كتقول لنفسك أنه غيخلّيك تكون سعيد. كلنا بشي طريقة كنقولو، "غير كون كان عندي هادشي، كون كنت سعيد وقادر نحبس نقلّب ديما على حوايج خرا." شنو كاين مورا ديك "غير كون" ديالك؟

كلنا كنحلمو. كلنا كنجرّيو مورا شي رؤية على كيفاش بغينا تكون الحياة. كلنا كنتمنّاو نتمتعو بالسيادة على حياتنا باش تتحقّق أحلامنا. كلنا كنحلمو وكنتخيلو. دابا، هاد القدرة ماشي شر في حد داتها، ولكن تجمعها مع الأنانية ديال الخطية، غتدخلّنا أكيد في المشاكل.

هاشنو كيوقع: ماشي غير عندك حلم، ولكن قلبك كيشدّه الحلم ديالك. كيولّي هو التعريف ديال لـ"الحياة". مابقيتيش هاز الحلم ديالك بيدّين مفتوحين. داكشي اللّي كان واحد النهار رغبة ولّى طلب، وماغيدوزش بزّاف ديال الوقت حتّى تشوف داك الطلب على أنه احتياج. هادشي اللّي قبل تمنّيتي يكون عندك ولّى حاجة لانقاش فيها، الحاجة اللّي نت مابغيتيش تعيش بلا بيها. دغيا غتولي ماشي سعيد، ماشي حيت الحياة صعيبة أولا الله كان ماشي أمين، ولكن حيت هاد الحاجة اللّي كتحكم قلبك بقوة هي بعيدة على يدّيك. نت يائس وفاشل. نت كتحسد الناس اللّي كيبان أنهم وصلو لأحلامهم. نت كتتساءل علاش نت بوحدك اللّي بقيتي بلاش. نت كتتساءل علاش نساك الله. حلم؟ أه، ولكن ملّي الحلم ديالك كيسود عليك، فراه كيفسد حياتك الروحية.

رد البال حتّى لداكشي اللّي كيوقع لعلاقتك مع الله ملّي أحلامك كتزيد تسيطر على قلبك. الله مابقاش هو اللّي كيحفزك وكيعطيك الشجاعة والرجاء. الله مابقاش هو المصدر ديال الفرح القوي. المجد ديال الله مابقاش هو الحاجة اللّي كتعيش من أجلها. المخافة ديال الله مابقاتش هي السبب علاش كتدير شنو كتدير. للأسف، الله ولّى غير مول التوصيل. المنجّي ديالك ولّى يسوع جنّي الأمنيات. إلا عطاك شنو بغيتي، فراه غتعبده وتخدمه، ولكن إلا ماعطاكش، فراك غتشك في الصلاح دياله والمحبة دياله، وماغيكونش عندك تحفيز كبير باش تقدّم حياتك ليه.

كنضن بلّي كاينين الآلاف ديال المسيحيين في هاد الموقف المحزن. ربما هادشي اللّي كيصوّر لينا الكتاب المقدس ملّي كيتكلّم على هاداك اللّي "سْمَحْتِي فْمْحَبّْتْكْ اللّْوّْلَى" (رؤيا 2: 4). وواخّا هادشي، كاينة نعمة من أجل هاد الصراع- النعمة اللّي كتحارب من أجل قلبك، نعمة أقوى من النصيب ديال أي حلم. غلب الأحلام الخطيرة ديال قلبك المتقلب وجرّي لعند النعمة اللّي هي ديالك في يسوع.

من أجل دراسة وتشجيع كتر: متى 6: 19-24