لشهر غشت؛ رحمات جديدة كل صباحعينة

الإيمان الحقيقي ماعمّره كيعرض عليك باش تخدع نفسك باش تفكّر بلّي الأمور هي حسن من الحقيقة ديالها. راه الإيمان الكتابي بشكل عجيب هو صادق وفيه الرجاء.

الإيمان الكتابي ماكيدورش على أنك تدير ابتسامة مزورة ونت كتعيش في حالة إنكار ديني دايمة. ماكيدورش على أنك تغطّي الواقع الواضح والمظلّم ديال عالم ساقط باستعمال تعابير كتابية مُبتَدَلة مزورة كلاها الزمان. ماكيدورش هادشي على أنك تصلي باللغة العربية الفصحى أولا شي لغة أصلية حيت هادشي كيخلّيك تحس روحي كتر. ماكيدورش على التباهي بالقدرة ديالك على باش تحافض على القوانين ديال الله أولا تفكّر بلّي نت مقدّس كتر حيت كتقرا الكتاب المقدس كلّه عاوتاني هاد العام. ماكيدورش على أنك تنقّي نفسك نهار الأحد، باش شخصيتك العامة تخبّع التفاصيل الحقيقية ديال حياتك الروحية. ماكيدورش على أنّك تحسب شحال من عام داز بلا ماتغيب على شي اجتماع ديال العبادة. ماكيدورش على أنك تزّوق التقوى ديالك باش تبان حسن لنفسك وللنّاس لخرين. ماكيدورش على أنك تقول بلّي نت بخير ملّي كتعطي دليل واضح يوميّا على أنك ماشي بخير. إلا كنتي كتدير أولا كتقول أولا كتفكّر في حوايج دينية الهدف منها هو باش تحميك من الواقع، فراك ماكتعيش المسيحية الكتابية. تقدر تحس بتحسن، ولكن قلبك ماسكّتوش الإيمان الكتابي. الإيمان ديال الكتاب المقدس ماعمّره يطلب منّك تنكر الواقع بأي شكل من الأشكال. الإيمان ديال الكتاب المقدس هو أنه في العظمة والمجد دياول الله اللّي قادر يشوف في أبشع الحقائق ديال الحياة ومايخافش.

براهيم ماكانش خاصّه ينكر الواقع باش يخرج من داره بلا مايعرف بالضبط فين غيدّيه الله. نوح ماكانش خاصّه ينكر الواقع باش يدوّز 120 عام وهو كيبني داك الفلك. بني إسرائيل ماكانش خاصّهم ينكرو الواقع باش يدورو على أريحا لمدة سبعة يّام. داود ماكانش خاصّه ينكر الواقع باش يواجه جوليات في المعركة. شدرخ وميشخ وعبدنغو ماكانش خاصّهم ينكرو الواقع باش يدخلو لداك الفرّان السخون. بطرس ماكانش خاصّه ينكر الواقع باش يوقف قدّام السنهدريم (المحكمة الدينية) ويرفض مايبشّرش بالإنجيل. كيما كتشوف، ماكانتش السداجة ديال الإيمان هي اللّي دفعات هاد الناس باش يديرو شنو دارو. لّا، كان الوضوح ديال الإيمان هو اللّي خلاهم يديرو شنو دارو.

غير ملّي كتشوف في هاد العالم المظلم من خلال النضاضر ديال الوجود والقوة والسلطة والحكمة والأمانة والمحبة والنعمة ديال ملك الملوك ورب الأرباب، راك غتشوف الواقع بوضوح. ماتقدرش توزن وتفهم داكشي اللّي كتواجهه إلا هملتي أكبر حق- الوجود ديال الله. في الحقيقة، هاكدا الكاتب ديال رسالة العبرانيين كيعرّف الإيمان: "وْبْلَا إِيمَانْ مَا يْمْكَنْشْ نْرْضِيوْ اللَّهْ، حِيتْ اللِّي بْغَا يْجِي لْعَنْدُه خَاصُّه يْآمْنْ بْلِّي هُوَ كَايْنْ وْكَيْجَازِي النَّاسْ اللِّي كَيْطْلْبُوهْ." (11: 6). واش ناقصك الإيمان؟ هرب لعند هاداك اللّي كيعطيك الإيمان فابور كهديته ديال النعمة.

من أجل دراسة وتشجيع كتر: دانيال 3: 8-30