لشهر غشت؛ رحمات جديدة كل صباحعينة

القوة المغيّرة ديال النعمة غتكون هي وحدة من العجائب الإلهية اللّي غنفرحو بيها للأبد ملّي تكون الأبدية هي بلادنا الأخيرة.

الكتاب المقدس ماشي مجموعة قصص ديال أبطال بشريين. لّا، الكتاب المقدس هو قصة بطل فادي اللّي كيغيّر الناس العاديين والضعاف بنعمته القوية. فكّر معايا في الشخصيات اللّي موجودة على الصفحات ديال الكتاب المقدس:

• موسى ماكانش قائد بالفطرة. هو رغب الله باش يصيفط شخص أخر لمصر، ولكن من خلال النعمة اللّي كتغيّر، ماكانش شي نبي في كل إسرائيل بحاله.
• يشوع كان خايف حتّى لموت من داكشي اللّي دعاه الله باش يدير، ولكن بقوة إلهية، هو قاد بني إسرائيل لأرض الموعد.
• كان جدعون مقتنع بلّي الله كان غالط في العنوان، وبلّي ماقصدش بالحق يعرض على جدعون باش يقود الجيش ديال بني إسرائيل ضد المديانيين، ولكن ملّي دار جدعون هادشي، هو كان شاهد على القوة العضيمة ديال الله اللّي دعاه.
• شمشون تخلّا على دعوته من أجل الحب ديال واحد المراة مخادعة، ولكن هو هدم الهيكل ديال الصنم داجون بقوة الله.
• كان داود هو واحد من ولاد يسى اللّي ماكانش عندو احتمال باش يگلس على العرش ديال إسرائيل، ولكن النعمة ديال الله عطاته قلب شجاع.
• ملّي إيليا بقا بوحده في لحظة إحباط، طلب من الله باش ياخد حياته، ولكن هو دار حوايج عظيمة بقوة الله.
• كان بطرس خايف لدرجة أنه نكر بلّي كيعرف يسوع، ولكن هو ولّى الراجل اللّي وقف قدّام المحكمة الدينية وقال شي حاجة بحال هاكدا، "تقدرو تهددوني بالقتل، ولكن أنا ماغنوقفش نبشّر بالإنجيل" (قرا أعمال الرسل 4: 19- 20).
• كان بولس عنده أقل احتمال باش يكون رسول. كان كيكره أتباع يسوع لدرجة كان كيقتلهم، ولكن بالنعمة ولّى هو المتكلّم بالإنجيل مول أعضم بلاغة.

الكتاب المقدس ماكيفرحش بالروح الحديدية ديال مجموعة ديال الأبطال. لّا، الكتاب المقدس كيحط قدّامنا ناس كانو بحالي وبحالك تماما. كانو ضعاف وخايفين. كان ساهل يخدعوهم وساهل يخونو. هما شكّو في الله بقدر ما تاقو فيه. في شي مرّات تبعو طريق الله وفي أوقات خرا تبعو الطريق ديالهم. هما ماكانوش أبطال بالفطرة. ماكانوش ناس خاصنا نفرحو بيهم. وواخّا هكداك، هما كلهم دارو حوايج عظيمة، حوايج كانت حاسمة للتقدم ديال قصد الله. شنو اللّي صنع الفرق؟ تقدر تجاوب على السؤال بكلمة واحدة: النعمة. النعمة غيرات قلوبهم، وعطاتهم الرغبة والقوة والحكمة باش يديرو داكشي اللّي ماكانوش قادرين يديروه بوحدهم. النعمة كتعني بلّي ملّي كيعطيك الله دعوة، فراه هو كيمشي معاك، وكيوفّر ليك كل ماكتحتاجه للمهمة اللّي بين يديك. ما كانوش طبيعيين. لّا، كانو متغيّرين!

من أجل دراسة وتشجيع كتر: رؤيا 19 (سمع لشنو كيفرحو بيه الأصوات في الجهة لخرا).