لشهر غشت؛ رحمات جديدة كل صباحعينة

ماتنساش، راه داكشّي اللّي خارج على سيطرتك هو كاين تحت السيطرة الدقيقة ديال هاداك اللّي هو كلّي المعرفة، كلّي الحكمة، وصالح.

الأغلبية ديال طاقتنا العاطفية كيقتلها التخمام. الأغلبية منّا شادنا الإحباط. الأغلبية منّا غالبًا ما كنكونو مدفوعين بالخوف. الأغلبية كيطير منّا النعاس بسباب التخمام. الأغلبية منّا كنحسّو بلّي حياتنا خارجة على السيطرة. الأغلبية منّا كنتمنّاو تكون عندنا قوة ماعمّر تكون عندنا. الأغلبية منّا مشلولين بالندم. الأغلبية كنتسائلو على فين هو الله وشنو كيدير. الأغلبية منّا كنحسّو بالوحدة وحتّى واحد ماكيفهمنا. الأغلبية منّا كنحسدو الحياة ديال الناس لخرين. الأغلبية منّا كنضنّو راه حنا بوحدنا ضد العالم. الأغلبية منّا، ملّي كنحطو حياتنا فوق الميزان، كنتجاهلو الحق التفسيري المطلق- الوجود والشخصية والخطة دياول الله.

أنا مقتنع بلّي الأغلبية منّا محتاجين نفهمو أولا نرجعو للنضرة للعالم اللّي كاينة في الكتاب ديال النبي دانيال. العالم ديال دانيال هو عالم ديال المصاعب. هو عالم ديال الظلم والقمع وعبادة الأصنام والخطر والفساد السياسي والحرب وأنواع مختلفة ديال المشاكل، ولكن هو ماشي عالم خارج على السيطرة. في الحقيقة، قدّام كل المصاعب، دانيال كيقدّم لينا عكس ما نقدرو نفكّرو فيه كون كنا غنحطّو العالم دياله فوق الميزان. دانيال كيقدّم لينا عالم، بكل طريقة وفي كل نقطة خاضع للسيطرة ديال هاداك اللّي هو قوي وحكيم، وهو اللّي شاد أحدات التاريخ البشري بين يديه. الأحدات كيوقعو حسب خطته. التاريخ كيتحرك حسب إرادته. حياة الناس كتتشكّل من خلال القصد دياله. هو عالم تحت الحكم. تأمل في هاد الكلمات: "هو الله الحي، تابت للابد. مملكته ماعمّرها تّهدم، وسلطانه غيكون حتّى للأخير. كيحرّر وكينجّي. كيدير علامات وعجائب في السما وعلى الأرض" (دانيال 6: 26-27).

بزّاف ديال لحوايج في حياتك خارجة على سيطرتك. كتواجه بزّاف ديال الحوايج اللّي كتخلّيك تحس ماشي مستعد أولا صغير أولا ضعيف. ولكن ماخاصّكش تخلّي بلاصة للتفكير بلّي حياتك هي خارجة على السيطرة. نت محتاج تفكّر نفسك بالحقائق اللّي دانيال كيواجهنا كلنا بيهم- بلّي فوق كل المصاعب اللّي كتحيّرنا وكتخلعنا، كاين إله كلّه حكمة وقوة ونعمة مجيدين اللّي كيحكم كل لحظة من كل موقف. لّا، ماشي ديما غتشوف يدّه. غالبًا ماغتفهمش شنو كيدير. غيكونو بلايص فين حياتك ماغتكونش منطقية بالنسبة ليك. شي مرّات، غتتمنّا تكون الحياة مختلفة. غيجيو أوقات فين غتحس بلّي راك ماشي مستعد لشنو محطوط قدّامك فوق الطابلة ديال حياتك. في ديك الأوقات، شوف لفوق وتدكّر بلّي فوق كلشي راه كاين واحد العرش، وفوقه گالس إله عنده جلال مايمكنش نتخيّلوه، كيحكم فوق كلشي من أجل المجد دياله والخير ديالك.

من أجل دراسة وتشجيع كتر: دانيال 6