لشهر يوليوز؛ رحمات جديدة كل صباحعينة

يسوع خلّص كلشي! ماكايناش شي فاكتورة مزال خاصك تخلّصها على خطيتك! نت دابا حر باش تتيق وتطيع.

حبس تحاول تربح شي حاجة من الله. حبس تحاول تربح القبول دياله كتر. حبس تحاول تربح الرضا دياله. حبس تحاول تربح الولاء دياله. حبس تحاول تدير شي حاجة باش تخلّص على بركاته. حبس تحاول تشري بالأخلاق ديالك مخرج من قدّام الغضب دياله. حبس تحاول توصل لشي مستوى فين تاخد سلام دائم معاه. غير حبس تحاول. غير حبس.

بزّاف ديال المسيحيين كيهزّو فوق كتافهم الحمل اللّي ماخاصهمش يهزّوه. كيفيقو كل صباح وكيهزّو الحمل التقيل ديال يحاولو بشي طريقة يحققو شي حاجة مع الله. هما كيخدمو بجد باش يمارسو داكشي اللّي ماعندهومش على أمل باش يقدرو يحققو المستحيل. هادشي بكل بساطة ماخدّامش. إدن فين كيدّي هادشي؟ هادشي كيدّي إما للتكبّر المخيف ديال التقوى الداتية- تقافة ديال ناس متعصبين متخلقين ضاهريّا، اللّي ماعندهمش مشكلة باش يحكمو على الناس اللّي ماحققوش مستوى التقوى اللّي هما كينضنو وصلو ليه- أولا كيدّي للخوف والإحباط- تقافة ديال الناس اللّي ماهربوش لعند الله بخطيتهم حيت كيخافو منّه.

بولس كيمسح هاد التقافة المشوهة واللّي كتمرّض ديال "شري طريقك باش توصل للنعمة" بعدد قليل من الكلمات: "وْبَايْنْ بْلِّي حْتَّى وَاحْدْ مَا كَيْوَلِّي مْتَّاقِي فْنَضَرْ اللَّهْ بْالشّْرَعْ" (غلاطية 3: 11). هادا بيان مامحتاج لا لشي مُقدّمة ولا تعديل. حتّى واحد مامقبول عند الله گاع حيت حفض الشريعة. حتّى واحد. صافي؛ ماكاينش حتياج لا لشي حل وسط وَلا صفقات. ماكاينش حتياج ليهم حيت أولاً مستحيل تشري طريقك باش يرضا عليك الله حيت الخطية كتخلّيك تهرّس الشريعة، وتانيًا راه تخلصّو كل الفاكتورات اللّي عليك كليّا من خلال الخْلاص الوحيد ديال صليب يسوع المسيح. المسيح ماخلّصش الدفعة اللّولة ديال الكريدي الأخلاقي ديالك؛ راه خلّص على الكريدي ديالك الأخلاقي بدفعة وحدة باش تقدر تعيش في علاقة مع الله خاوية من الديون للأبد. شريعة الله ماشي هي الطريقة ديال الخْلاص ديالك حيت ماكايناش شي طريقة للخْلاص ملّي المتطلبات ديال الكريدي تخلصات مرة وحدة وللأبد بخلصة وحدة.

هادشي علاش حبس تحاول تاخد أي حاجة من الله. حبس تتخبّع منّه ملّي تدنب. حبس تقارن راسك مع الناس لخرين، ونت كتتساءل على واش الله كيبغيك أقل حيت نت ماشي "مزيان" بحالهم. حبس تسمّي ديك الحوايج المزيانة اللّي كتدير على أنها أعمال ديال التقوى اللّي ماشي غير كتخلّيك تقرّب لله وصافي، ولكن حتّى كتتبت للناس لخرين على أنك تقي. غير حبس تطلب من الشريعة والدين يديرو داكشي اللّي غير النعمة تقدر تدير، وبدا ترتاح في حقيقة أنه ماعندك أي فاكتورة أخلاقية خاصّك تخلّصها حيت يسوع خلص كلشي على الصليب. وملّي تدنب، ماتتضاهرش بحال مادرتي والو، ماتخافش، وماتتخبّعش. جرّي لعند يسوع وخود الرحمة في وقت الإحتياج ديالك، الرحمة اللّي هو خلّص باش تكون عندك.

من أجل دراسة وتشجيع كتر: إشعياء 53