God bring mense in die regte verhouding met Hom deur geloof alleen (Romeine 3:19-31)

Dit bring Paulus dan by die tweede hoofdeel van sy boodskap wat strek van Romeine 3:19-4:25 waarin hy op hierdie boodskap uitbrei dat alle mense deur geloof alleen in 'n regte verhouding met God gebring word (3:19-31) met Abraham wat daarom die vader is van almal wat glo, Jode en heidene (4:1-25).

Alle mense word slegs deur geloof in die regte verhouding met God gebring (3:19-26)

Dit beteken dat die hele wêreld hulle voor God moet verantwoord – d.w.s. aan sy straf oorgegee is – en tegelykertyd dat daar geen mens is wat op grond van die uitvoering van die wet voor Hom geregverdig sal word nie.

Die enigste wyse waarop ‘n mens in die regte verhouding met God gebring kan word, is deur die geloof in Jesus Christus (3:19-26). Dit is ‘n boodskap, sê Paulus, wat die OT – die Wet en die Profete – al van getuig het. Daar is wat dit betref geen onderskeid tussen Jode en nie-Jode nie:

“Almal het trouens gesondig, en die eer aan God ontbreek by hulle; en tog word hulle goedgunstig op grond van sy genade vrygespreek deur die bevryding in Christus Jesus.” (verse 23-24)

God het Jesus Christus deur sy dood aan die kruis as versoeningsoffer aanvaar wat elkeen wat glo in die regte verhouding met Hom bring. Hy sien gelowiges se sonde oor en verklaar hulle regverdig in sy oë.

Daarmee kon God sy genade en sy geregtigheid handhaaf.

Ons geloof bevestig daarom die wet (3:27-31)

Dit beteken egter natuurlik nie dat die wet daarmee tot niet gemaak word nie. Inteendeel, ons geloof bevestig die wet. Vir Jode en vir nie-Jode. Soos die voorbeeld van Abraham in hoofstuk vier sal aantoon.

Boodskap en betekenis

Paulus argumenteer in Romeine 3 dat alle mense—hetsy Jood of nie-Jood—onder die mag van die sonde staan en daarom skuldig is voor God. Hy beklemtoon dat niemand op grond van die wet geregverdig kan word nie, omdat niemand dit volmaak kan onderhou nie. Hierdie universele skuldigheid maak die weg na redding duidelik: dit is slegs deur geloof in Jesus Christus dat mense in 'n regte verhouding met God gebring word. Christus se offer aan die kruis dien as versoening, waardeur gelowiges uit genade vrygespreek word. Paulus verduidelik verder dat hierdie geloof die wet nie opskort nie, maar eerder bevestig as 'n getuie van God se geregtigheid en genade. Hierdie boodskap, wat die basis vir regverdiging deur geloof alleen vorm, word uiteengesit in die konteks van beide die Ou Testament en die nuwe openbaring in Christus.