Nie Goed NieVoorbeeld

Voel jy ooit soos 'n perfeksionis? Indien wel, sal jy weet dat dit nogal spanning kan veroorsaak. Jy voel altyd dinge kan net nog 'n bietjie beter wees as jy net 'n bietjie harder werk of meer tyd daaraan bestee om dit reg te kry. Ja ... dis irriterend.

Jy hoef ook nie 'n perfeksionis te wees om die spanning daarvan te voel om die regte dinge in die lewe te doen nie. Daar is soveel druk om goed te doen, altyd op hoogte van sake te wees en altyd die regte besluite te neem. Dit kan alles saamspan om jou 'n bietjie paranoïes te laat voel. Daar is soveel besluite om elke dag te neem en soveel druk om dit reg te doen. Sal dit nie lekker wees om 'n slag op te hou om jou daaroor te bekommer nie? Wat gebeur wanneer die spanning om goeie dinge te doen, te veel word?

Petrus het hieroor geskryf in 1 Petrus, en hy het gesê om die regte dinge te doen kan soms spanningsvol wees. Hy herinner sy lesers egter dat Jesus ook swaargekry het. As ons spanning ervaar omdat ons probeer goed doen, kan ons onthou dat Jesus dit ook beleef het. Hy weet hoe dit voel.

As ons bekommerd of gespanne voel omdat ons goeie dade doen, dan weet ons ons is op die regte pad. Die goeie nuus is dat God mense seën wat probeer om wyse keuses te maak en dít wat jy nou deurgaan, sal die moeite werd wees. Jy hoef nie 'n perfeksionis te wees nie — jy kan leer om staat te maak op die Een wat alreeds volmaak is.