HerskepVoorbeeld

Trek die Ou Klere Uit en Trek Nuwe Klere Aan

Deur Rick Warren

"Soos ’n mens vuil klere uittrek, moet julle julle ou geaardheid uittrek, want dit is vol sonde en wil net verkeerde dinge doen ... Julle moet ’n nuwe gesindheid kry en op ’n nuwe manier oor dinge dink. Hierdie nuwe lewenstyl moet julle deel van julle lewe maak soos ’n mens nuwe klere aantrek" (Efesiërs 4:22b-24 NLV).

As jy blywende verandering in jou lewe wil ervaar, moet jy met jou liggaam begin, en dit sluit jou manier van dink in, sodat jy God kan vereer deur wat jy dink en dit wat jy in jou gedagtes toelaat.

Efesiërs 4:22b-24 (NLV) sê: “Soos ’n mens vuil klere uittrek, moet julle julle ou geaardheid uittrek ... Julle moet ’n nuwe gesindheid kry en op ’n nuwe manier oor dinge dink."

Let op dat daar iets is wat jy moet "uittrek" en iets wat jy moet "aantrek". Wat jou gesondheid betref, kom dit daarop neer dat jy moet ophou om sekere dinge te doen en ander dinge moet begin doen. Hou op om negatiewe, nadelige dinge in jou liggaam toe te laat en begin om dinge toe te laat wat jou opbou.

Hou op om negatiewe, nadelige dinge in jou gedagtes toe te laat en begin kyk en luister na dinge wat Jesus vereer en jou meer soos Hom maak. Om jou gedagtes te vernuwe moet jy eers van iets ontslae raak voor jy iets nuuts kan inlaat.

Kom ons veronderstel jy gaan na 'n klerewinkel om 'n nuwe jas te koop. Jy vind een en gaan na 'n aantrekhokkie toe. As jy alreeds 'n jas aanhet, gaan jy nie die nuwe een bo-oor die ou een aantrek nie. Dit sal laf wees, want jy gaan nie uitvind of dit pas nie! Dit maak sin om die ou jas uit te trek voordat jy die nuwe een aantrek.

Dis ook waar vir jou geestelike-, emosionele- en sielslewe. Jy moet die oue "uittrek" voor jy die nuwe kan "aantrek".