HerskepVoorbeeld

Die Reuse Tussen Jou en Jou Droom

In die verhaal van Dawid, in 1 Samuel, lees ons dat hy in werklikheid teen vier ander reuse ook moes veg voordat hy teen Goliat te staan gekom het. Hulle was nie menslike reuse nie, maar reuse in sy denke. 

Jy sal heel waarskynlik daardie reuse in die gesig staar, eerder as om teen 'n Goliat te veg, maar hulle kan net so groot en intimiderend wees en in jou pad staan om die persoon te word wat God wil hê jy moet wees en jou weerhou daarvan om die droom te vervul wat God in jou hart geplaas het.

Die eerste reus is versuim. Geen droom word onmiddellik vervul nie. God gee die droom vir jou op 'n sekere dag, maar Hy vervul dit nie die volgende dag nie. Daar is altyd 'n wagtyd. 

In Dawid se geval was dit sy pa wat hom van sy droom weerhou het. Nadat Samuel Dawid as koning gesalf het, het Isai vir Dawid gesê om terug te gaan om skape op te pas!

Wanneer God se plan iemand anders se plan weerspreek, gaan daar 'n vertraging wees en mense gaan probeer om jou terug te hou — soms is dit selfs die mense wat jou die liefste het. God is egter getrou en Hy sal sy werk op sy tyd in jou voltooi. 

Die tweede reus wat jy kan teëkom, is moedeloosheid. Goliat het vrees by die Israeliete ingeboesem en almal was oortuig dat hulle die geveg sou verloor. 

Na wie luister jy, wat sê dat dit nie gedoen kan word nie? Wie skiet jou drome af en sê dit sal nooit gebeur nie?

Soms het jy net 'n ander stem nodig — 'n kind van die plaas af met helder oë, wat sê: "Hierdie ou is niks nie. Ons kan hom oorwin.”

Die derde reus wat in jou pad staan, is afkeuring. In Dawid se geval was dit sy broer wat sy motiewe bevraagteken het en probeer keer het dat hy teen Goliat gaan veg.

Wanneer God vir jou 'n droom gee waarvoor ander mense bang is en jy doen dit in elk geval, sal jy veroordeel, gekritiseer en misverstaan word. Jy sal moet besluit wat die meeste vir jou saakmaak — die goedkeuring van ander mense of die goedkeuring van God.

Die vierde reus wat jy dalk moet konfronteer, is twyfel.

Niemand was meer bekend met oorlog as koning Saul nie. Hy het gedink Dawid is mal om te dink dat 'n seun teen 'n soldaat soos Goliat kan veg. 

Dalk sê 'n kundige dat jy dit ook nie sal kan doen nie. Dis genoeg om jou in jouself te laat twyfel. 

Toe ek "Die Doelgerigte Lewe" geskryf het, het ek 'n brief (wat ek geraam het) van die redakteur gekry, wat soos volg lees: “Hierdie boek gaan nooit suksesvol wees nie. Niemand gaan 40 hoofstukke lees nie." Die kundiges sit dikwels die pot mis. 

LUISTER na vandag se klankgreep van pastoor Rick se lering >>