HerskepVoorbeeld

Kry die Beste Inligting Sodat Jy Jou Beste Lewe Kan Leef

Indien jy gesonde denke wil hê, moet jy jou gedagtes met die waarheid voed.

Ons almal weet hoe belangrik voeding is. Goeie kos en goeie kalorieë maak jou sterker en gesonder en gee jou meer energie. Slegte kalorieë en gemorskos beskadig jou liggaam. Dieselfde geld vir jou denke. Jy moenie jou denke met gif of gemors voed nie, maar met die waarheid.

Ek het eenkeer die voorreg gehad om 'n klas by die Oxford Universiteit aan te bied en terwyl ek daar was, is ek uitgenooi na 'n byeenkoms van die Oxford Ontledingsvereniging. Dis 'n groep waarvan jy nog nooit gehoor het nie, wat 'n groot invloed in die wêreld het. Elke dag teen omtrent ses uur in die oggend, vergader die belangrike geleerdes van Oxford in 'n vertrek om verslae van regoor die wêreld te kry, van wat in die laaste 24 ure gebeur het — van die oespryse in China wat styg, tot die groeiende onrus in die Midde-Ooste. Dan neem hulle 'n besluit oor wat daaroor gesê moet word. Teen elfuur is 'n verslag al aan groepe gegee wat baie geld betaal vir hierdie inligting. Groepe soos die CIA en groot maatskappye. 

Die Oxford Ontledingsvereniging is gefundeer op die idee dat die beste leiers die beste besluite neem wanneer hulle die beste inligting het. Selfs al is jy 'n goeie leier, en jy het nie die beste inligting nie, gaan jy 'n slegte besluit neem. 

Jy het die beste inligting nodig om die beste lewe te leef wat God wil hê jy moet leef. Daardie inligting is in die Woord van God. 

In Matteus 4:4 sê die Bybel: “'n Mens leef nie net van brood nie maar van elke woord wat uit die mond van God kom.”

God wil hê dat jy die beste inligting kry sodat jy die beste besluite kan neem en God se beste vir jou lewe kan ontvang. Jy doen dit deur regdeur jou dag, elke dag, op die Woord van God te voed.

LUISTER vandag na die klankgreep van pastoor Rick se lering >>