HerskepVoorbeeld

Laat Jesus Jou Las Ligter Maak

Ek weet nie watter las jy dra nie. Ek weet nie wat jou onderkry nie. Ek weet egter wat die oplossing is.

Jesus sê: “Kom na My toe, julle almal wat moeg is en swaar laste moet dra, en Ek sal julle lewens verkwik. Neem my juk op julle skouers. Kom leer van My, want Ek is sag en nederig van hart, en julle sal rus en nuwe moed vir julle lewe kry. Want my juk sal sag op julle skouers rus en my las is lig om te dra” (Matteus 11:28-30 NLV). 

Vir baie jare lank het ek nie daardie verse verstaan nie, want ek het nie geweet wat 'n juk is nie. Wanneer Jesus sê: “Neem my juk op julle skouers,” het dit vir my geklink of Hy my nog iets sou gee wat ek moes hanteer. My las is swaar genoeg, Here. Ek hoef nie u probleme ook te dra nie.

'n Juk is eintlik 'n stuk hout met twee holtes wat jy oor twee osse se skowwe sit, sodat hulle 'n wa kan trek.

Die nut van 'n juk is dat dit die las halveer. Sonder 'n juk moet een os die volle gewig alleen trek. As jy egter die os saam met 'n ander os in die juk sit, trek hulle twee die wa saam en die gewig is die helfte so swaar. 

Wanneer Jesus sê dat jy sy juk moet neem, sê Hy nie dat Hy vir jou sy probleme gaan gee nie. Jesus het geen probleme! Hy sê dat Hy jou probleem met jou gaan deel. Hy gaan jou las deel. Hy gaan jou spanning op Hom neem en dit saam met jou dra.

Dis wonderlik!

Hy gebruik drie werkwoorde in hierdie verse: kom, leer en neem. Jesus sê: “Kom na My toe. Span saam met My. Leer dan hoe Ek dit doen. Neem 'n ligter las op. Dit gaan jou spanning verminder. Dit gaan dit vir jou makliker maak om deur die lewe te gaan.”
 Wanneer jy saam met Christus in 'n juk is, beweeg jy saam met Hom. Jy beweeg in dieselfde rigting en teen dieselfde spoed en jy beweeg in die regte rigting. 

LUISTER na vandag se klankgreep van pastoor Rick se lering >>