Wat 'n Lieflike Naam Is Dit Nie

Deur Danny Saavedra

"In die begin was die Woord daar, en die Woord was by God, en die Woord was self God. Hy was reeds in die begin by God. Alles het deur Hom tot stand gekom: ja, nie 'n enkele ding wat bestaan, het sonder Hom tot stand gekom nie" (Johannes 1:1-3).

Wat is die eerste ding wat jy van iemand te wete kom wanneer julle vir die eerste keer ontmoet? Sy naam! Hoekom? Name help ons om mense te onthou, te weet wie hulle is en te weet met wie ons gesels of na wie ons verwys. 

Vroeër het name ook iets beteken. Deesdae kies mense vir hulle kinders name op grond van wat hulle dink oulik of gewild is, sonder om na te vors wat die etimologiese oorsprong of kulturele betekenis en erfenis daarvan is. In die antieke tye is name vir 'n spesifieke rede gegee. Isak ("hy lag") se naam verwys na Abraham en Sara se reaksie toe God hulle vertel het dat hulle 'n seun op hulle ouderdom sou kry. Jakob ("hy gryp die hakskeen") het sy naam gekry omdat hy met sy geboorte met sy hand "... aan Esau se hakskeen vasgehou [het] ..." (Genesis 25:26). 

In die Bybel was name baie betekenisvol omdat hulle dikwels iets omtrent die persoon vertel het. Dit is veral waar in God se geval, want Hy het baie name wat uiters betekenisvol is. Van El Shaddai tot Jehovah-Raah onthul iets omtrent Hom. Van al die name wat in die Bybel aan God gegee is, is die mees interessante en unieke een waarskynlik die een wat in Johannes 1:1 aan Hom toegeskryf word. "In die begin was die Woord ..."

Die Griekse woord wat hier vir Woord gebruik word, is logos. Die begrip logos is kragtig, ingewikkeld en 'n lieflike idee. Die eenvoudigste manier om die Griekse filosofie hieroor te verduidelik, is dat logos die rede of onuitgesproke verduideliking van iets is. Die term beskryf eintlik 'n frase wat as een gedagte saamgestel en in woorde uitgedruk word. Dit word beskou as die allesomvattende rede wat onafskeidbaar deel van alle dinge is; die bindende wette wat alles in stand hou.

In die Hebreeuse kultuur verwys hierdie idee na die dinamiese krag van God se wil. Hulle gebruik dikwels die term memra — 'n woord wat afgelei word van die Aramese woord vir "praat" — om God se kreatiwiteit en wil te beskryf. 

Die verstaan van hierdie begrip en ook die term wat in Johannes 1:1 gebruik word, vat ons terug na die skeppingsverhaal in Genesis 1. Daar sien ons hoe God praat en alles in die heelal tot stand kom. Hebreërs 11:3 verduidelik dit verder so: "... dat die wêreld deur die woord van God geskep is: die sigbare dinge het dus nie ontstaan uit iets wat ons sien nie." 

Wanneer ons lees wat Johannes 1:1 sê: "In die begin was die Woord daar, en die Woord was by God, en die Woord was self God", sê die apostel eintlik dat Jesus Christus, die Seun van God, die lewende verpersoonliking van die Woord van God is. Hy is God in die vlees, die beeld (eikón: allerhoogste uitdrukking, weerspieëling en verteenwoordiging; spieëlbeeld) van die onsigbare God (Kolossense 1:15); die Een wat aan die begin alles deur sy woorde geskep het (Genesis 1:1-2; Psalm 33:9; Hebreërs 11:3). Hy is die karakter, hart, wil en denke van God die Vader, wat aan die wêreld geopenbaar is. Hy is, soos die Grieke glo, die allesomvattende rede vir alle dinge (Johannes 1:3); die bindende wette wat alle dinge laat bestaan (Kolossense 1:15-17). 

Raai wat? Johannes 1:14 vertel vir ons dat die Woord, Hy wat die heelal bymekaar hou en deur wie die hele skepping tot stand gekom het, het "... mens geword het en tussen ons kom woon ..." Dis waaroor Kersfees gaan. God het mens geword! Hy het ons so lief, dat Hy die hemel verlaat het om vir ons 'n manier te gee om in die hemel te kom en die ewigheid saam met Hom te kan deurbring! Dis hoekom ons in Matteus 1:23 lees van die engel wat vir Josef gesê het: "... hulle sal hom Immanuel noem ..." (wat "God met ons") beteken. Die Seun van God het gekom om sy Vader se denke en hart — sy Woord — aan die wêreld bekend te maak ... en ons te red. Dis hoekom die engel vir Josef beveel het om Hom Jesus te noem (Yeshua: God is redding), "... want dit is hy wat sy volk van hulle sondes sal verlos" (Matteus 1:21).

Terwyl ons gereed maak om oor 'n paar dae Kersfees te vier, onthou dat Immanuel, ons kosbare Jesus, die ewige Woord, ons Koning en Redder, aarde toe gekom het sodat ons vir God kan leer ken, sy teenwoordigheid kan ervaar en gered kan word. Hy het gekom om aan ons "die reg om kinders van God te word", verniet te gee (Johannes 1:12). Môre gaan ons uitvind hoekom God moes kom ...