Om Die Stem Van God Te HoorVoorbeeld

'n Bybelgebaseerde-idee

Lees vandag se Bybelverse.

Baie keer wonder ons of 'n idee wat by ons opkom, 'n opdrag van God af is, 'n misleiding van die Satan of net iets wat ons wil doen. Dit is uiters belangrik om die verskil te ken en hoe om God se stem te onderskei, aangesien dit ewige gevolge kan hê.

God word baie keer geblameer vir boosheid wanneer mense sê: "God het vir my gesê om dit te doen!" Die Bybel sê in 1 Johannes 4:1: "Geliefdes, moenie enigeen glo wat sê dat hy die Gees van God het nie, want daar is nou reeds baie vals profete in die wêreld, maar ondersoek elkeen, ondersoek of sy gees van God afkomstig is."

Stem die idee wat jy nou in jou gedagtes het ooreen met Bybelse beginsels? God se wil sal nooit die Woord van God weerspreek nie. God sê nie een ding, verander dan van plan, en sê 'n ander ding nie. As Hy dit gesê het, is dit waar, en sal dit altyd waar wees.

God is konsekwent. Hy is nie buierig nie. Hy verander nie van plan nie. Hy sal nooit vir jou sê om 'n beginsel te oortree wat Hy reeds in sy Woord, die Bybel, opgeteken het nie.

Die eerste vraag wat jy moet vra, is: "Stem hierdie gedagte ooreen met wat God alreeds gesê het?" As dit wat jy in jou gedagtes het, iets weerspreek wat God reeds in die Bybel gesê het, dan weet jy dit is verkeerd.

Jesus het in Lukas 21:33 gesê: "Die hemel en die aarde sal vergaan, maar my woorde nooit." God se Woord is vir ewig, want die waarheid verander nooit nie. As iets 5 000 jaar gelede waar was, was dit 1 000 jaar gelede ook waar, is dit vandag waar, en sal dit 5 000 jaar van vandag af steeds waar wees.

Mense mag dalk sê: "God het dit gesê; ek glo dit, uit en gedaan." Nee! God het dit gesê, en dis uit en gedaan – of jy dit nou glo of nie!

As God vir jou sê om iets te doen, sal Hy dit nooit weerspreek nie. Die eerste vraag wat jy moet beantwoord, is: "Is hierdie idee in ooreenstemming met die Woord van God?"