Phila ngamandla nobukhalipa!Isampulu

Yonke Into Usebenzela Ukuba Isilungele

UThixo ulawula yonke into kuwo onke amabakala obomi bethu. Unako kakhulu ukwenza nayiphi na imeko ibe yinzuzo kuthi njengamakholwa.

“Siyazi ke ukuba kuyo yonke imeko uThixo ubenzela okulungileyo abo bamthandayo, ababizwe ngokwenjongo yakhe.” KWABASEROMA 8:28

Uyakwazi ngokugqithisileyo ukusingatha eyona mingeni yobomi intsonkothileyo, kwaye uza kusikhokela ekuzalisekiseni isicwangciso sakhe sobomi bethu. Into ayifunayo kukuba nje simthembe uza kwenjenjalo

“Kholosa *ngoNdikhoyo ngomxhelo wakho wonke, ungaze ungqiyame ngezakho iimbono. Mkhumbule uNdikhoyo kuyo yonke ihambo yakho, waye ke yena eya kukukhokela kuzo zonke iindlela zakho.” IZAFOBE 3:5-6

Ukuthemba uThixo akuthathi ndawo yoxanduva lwakho ngenkqu nobugosa obuhle. Ngaphaya koko, uxanduva lwakho ngenkqu nokumthemba kuyahambelana. Xa sidlala eyethu indima, uThixo usoloko ethembekile ukudlala eyakhe nokusikhokela ngamandla.

Ikakhulu, ukukhokelwa mguThixo kuza ngokuvula nangokuvala “iingcango” kwiimeko zethu. Ngamanye amaxesha, iimeko zethu zifuna ukungenelela okungcwele kukaThixo ukuze siphile, ummangaliso, okanye ukufeza into ebingenako ukwenzeka ngenye indlela.

Waza uYesu wabakhangela wathi: “Abantu bona abanako ukuyenza le nto, kodwa yena uThixo unako ukuzenza zonke izinto.” UMATEWU 19:26

Akukhathaliseki noba kukujongana nesifo esinganyangekiyo, amaxesha obunzima kwezezimali, okanye nokushiywa sisizalwane kungalindelekanga, uThixo ukhona kwaye uyakwazi ukusebenza ngaphezu kokwemvelo ngamaxesha anjalo.

UThixo yingcungela ekujikeni intlekele ibe luloyiso kwaye nobunzima bube luvuyo ngoMoya oyiNgcwele. Ungaze uthandabuze ukuba uThixo “usekumsebenzi wokwenza imimangaliso” namhlanje. UThixo uyakwazi ukungenelela nakweyiphi na imeko yokungenakwenzeka.