Soma Biblia Kila Siku Disemba/2022Mfano

Yesu hakunawa kabla ya chakula (m.38). Wayahudi walikuwa na desturi ya kunawa kabla ya chakula ili wawe safi kidini. Kusudi la Yesu kutonawa ni kupata nafasi ya kuwasema Mafarisayo na Waandishi (‘wana-sheria’). Maana usafi wao ulikuwa wa nje tu. Hawakutubu moyoni. Tafakari Yesu anavyoeleza hali yao: Ndani yenu mmejaa unyang’anyi na uovu ... mwaacha mambo ya adili, na upendo wa Mungu ... mwawatwika watu mizigo isiyochukulika, wala ninyi wenyewe hamwigusi mizigo hiyo hata kwa kimoja cha vidole vyenu (m.39, 42, 46). Kwa hiyo Yesu anawaambia, Toeni sadaka vile vya ndani, na tazama, vyote huwa safi kwenu (m.41). Jambo kuu kwa Mungu ni haki (‘adili’) na upendo (m.42). Je, umetubu moyoni na kuyazingatia yale yaliyo muhimu machoni pa Mungu? Au Ukristo wako ni wa nje tu? Zingatia ilivyoandikwa katika Isa 1:15-18: Nanyi mkunjuapo mikono yenu, nitaficha macho yangu nisiwaone; naam, mwombapo maombi mengi, sitasikia; mikono yenu imejaa damu. Jiosheni, jitakaseni; ondoeni uovu wa matendo yenu usiwe mbele za macho yangu; acheni kutenda mabaya; jifunzeni kutenda mema; takeni hukumu na haki; wasaidieni walioonewa; mpatieni yatima haki yake; mteteeni mjane. Haya, njoni, tusemezane, asema Bwana. Dhambi zenu zijapokuwa nyekundu sana, zitakuwa nyeupe kama theluji; zijapokuwa nyekundu kama bendera, zitakuwa kama sufu.