Soma Biblia Kila Siku Disemba/2022Mfano

Kwanza inaelezwa Mungu alivyo (m.31: Ni nani aliye mwamba ila Mungu wetu?) na yale afanyayo: Umenipa ngao ya wokovu wako, Mkono wako wa kuume umenitegemeza, Na unyenyekevu wako umenikuza. Umezifanyizia nafasi hatua zangu (m.35-36a). Halafu inaelezwa yale aliyofanya Daudi baada ya kutiwa nguvu na Mungu: Mungu ndiye anifungaye mshipi wa nguvu, Naye anaifanya kamilifu njia yangu. Miguu yangu anaifanya kuwa ya kulungu, Na kunisimamisha mahali pangu pa juu. Ananifundisha mikono yangu vita, Mikono yangu ikaupinda upinde wa shaba (m.32-34). Mfuatano huu watukumbusha nini? Mungu akifanya kazi pamoja na waumini, hawajisikii wenye nguvu, bali kila wakati wanakumbushwa kwamba mwenye nguvu ndiye Mungu. Angalia pia lengo la Mungu kututia nguvu. Ni kuzifanya njia zetu ziwe kamilifu (m.32, Mungu ... anaifanya kamilifu njia yangu). Hatupewi nguvu ya kufanya tupendavyo sisi, bali ni muhimu kujikabidhi kwa ahadi zake.