Soma Biblia Kila Siku Disemba/2022Mfano

Mungu ni msaada kwa wote wamwitao. Jambo pekee la somo ni kuonyesha kuwa baraka za Mungu hazitenganishwi na hali yetu mbele zake. Angalia jinsi hali hiyo inavyofungamana na imani yetu, wakati vitendo vyetu ni tokeo tu la imani. Kwanza na hata mwisho Daudi anamtegemea Mungu na ahadi zake. Katika m.18 anasema, Bwana alikuwa tegemeo langu; na katika m.30 anasema, Mungu, njia yake ni kamilifu, Ahadi ya Bwana imehakikishwa, Yeye ndiye ngao yao. Wote wanaomkimbilia. Kwa hiyo anazishika njia za Mungu na kukataa uovu. Muumini atendaye hivyo ni mkamilifu, wakati mpotovu ni huyu anayeacha njia za Mungu kwa kuwa hamtegemei. Mtu huyo asitegemee msaada wowote. Daudi anahitimisha, Kwa mtu mwenye fadhili utakuwa mwenye fadhili; Kwa mkamilifu utajionyesha kuwa mkamilifu; Kwake ajitakasaye utajionyesha kuwa mtakatifu; Na kwa mpotovu utajionyesha kuwa mkaidi (m.25-26).