Kusikia Kutoka Kwa Mungu Kila AsubuhiMfano

Uchungu Huzuia Kusikia

Uchungu wote na ghadhabu na hasira na kelele na matukano yaondoke kwenu, pamoja na kila namna ya ubaya (WAEFESO 4:31) 

Uchungu ulioelekezewa Mungu ni kizuizi cha hakika kwa kusikia sauti yake. Wakati wowote uchungu unapojaribu kukushikilia, ukatae. Wakati mwingi, shetani hujaribu kutufanya tufikirie ni sisi peke yetu tulio na wakati mgumu. Sina maana ya kusikika kama ambaye sina huruma, lakini hata kama shida zetu ni mbaya vipi, kuna mtu ambaye zake huwa mbaya kuliko zetu. 

Kuna mwanamke aliyenifanyia kazi ambaye mumewe alimuacha baada ya miaka thelathini na tisa ya ndoa. Alimwachia tu barua, na akaenda. Ulikuwa msiba kwake! Nilijivuna sana kwa ajili yake aliponijia baada ya wiki chache na kuniambia, “Joyce, tafadhali niombee nisije nikamkasirikia Mungu. Shetani ananijaribu sana kwamba nimkasirikie. Siwezi kumkasirikia Mungu. Ndiye rafiki peke yake niliye naye. Ninamhitaji!”

Uchungu ulikuwa umeanza kuota mizizi katika moyo wa rafiki yangu kwa sababu maisha yake hayakuwa yameenda jinsi alivyotaka. Tunapoumia mioyo, lazima tutambue kwamba kila mtu ana hiari huru na hatuwezi kudhibiti hiyo hiari huru- hata katika maombi. Tunaweza kuomba Mungu azungumze na watu huenda wakatudhuru; tunaweza kuomba awaongoze kutenda yaliyo mema bali si mabaya, lakini la msingi ni kwamba, lazima awaache kuchagua wanayotaka. Mtu akifanya uteuzi unaoumiza, tusimlaumu Mungu na kuwa na uchungu naye. 

NENO LA MUNGU KWAKO LEO

Ukiumia, usije ukamlaumu Mungu kamwe. Ndiye rafiki mzuri sana uliye naye.