Ura për te MarkuShembull

Jo prej prekjes, por prej besimit

Pa dyshim që dishepujt ishin të çuditur nga pyetja e Jezusit: “Kush më preku?”. Të gjithë po ia preknin rrobat Jezusit, ndërsa e ndiqnin duke u shtyrë. Çfarë priste Ai? Por Zoti dinte diçka që dishepujt nuk e dinin. Vini re në pasazhin e mësipërm që Ai vështroi fytyrat e turmës rreth Tij; Ai po kërkonte gruan që e kishte prekur Atë, ndryshe nga njerëzit e tjerë. Dhe më në fund, gruaja nuk mund ta fshihte më gjatë atë që kishte bërë. Ajo i tregoi Atij të gjithë historinë. Por, pse e detyroi Zoti atë grua t’i tregonte të gjitha ato hollësi vetjake në mes të turmës? Qëllimi i Tij nuk ishte aspak që ta vinte atë në siklet. Përkundrazi, Ai dëshironte t’i mësonte asaj edhe të tjerëve diçka shumë të rëndësishme për besimin. Me shumë siguri ajo u largua me trupin e saj të shëruar. Por, mbase ajo gjykonte në vetvete se ishte rroba e Tij ose mbase kishte qenë prekja e saj që e kishte bërë shërimin. Ajo kishte nevojë të mësonte që Vetë Jezusi ishte Shëruesi, dhe që ajo i kishte besuar Atij për shpëtimin.

E dimë që shumë njerëz ishin duke e prekur Jezusin gjatë rrugës. Sidoqoftë, Ai asnjëherë nuk ndjeu nga bërrylat dhe shpatullat e tyre atë që Ai ndjeu kur dora e druajtur dhe e turpshme e kësaj gruaje e preku rrobën e Tij. Kështu, pasi gruaja i tregoi Jezusit historinë, Ai shpjegoi se çfarë ia solli në të vërtetë shërimin: ajo kishte besuar që Ai ishte në gjendje ta shëronte. Nuk ishte prekja, por ishte besimi i saj në Jezusin që e shëroi. Pastaj Jezusi i tha që të shkonte në shtëpi dhe të shijonte paqen që Ai kishte sjellë në jetën e saj.

Ju keni probleme, mëkate, faje dhe çdo lloj nevojash frymërore. Është e rëndësishme se ku i çoni ato (te këmbët e Jezusit në lutje), por, gjithashtu, ka rëndësi edhe mënyra se si i çoni ato.

Kur luteni, a besoni në zemrën tuaj që Perëndia është në gjendje dhe i gatshëm t’ju shpëtojë dhe t’ju ndihmojë? Kësaj gruaje i vinte turp për problemin e saj, po ajo ishte e bindur që Jezusi mund ta shëronte. Edhe besimi më i vogël dhe më hezitues është besim. Premtimi i Zotit është që kushdo që beson dhe i zë besë Atij nuk do të turpërohet. Nëse nuk mund të besoni që Zoti është i gatshëm t’ju shpëtojë, atëherë shkoni tek Ai ashtu siç shkoi kjo grua. Ajo nuk u zhgënjye, sepse Zoti kënaqet me ata që e kanë frikë Emrin e Tij dhe shpresojnë në mëshirën e Tij.