Ura për te MarkuShembull

Familja e vërtetë e Jezusit

Më herët, Marku tregoi që familja dhe miqtë e Jezusit ishin duke u shqetësuar shumë për Atë. Ata mendonin që Atij ishte duke i ikur mendja, kështu që ata vendosën të shkojnë dhe të flasin me Jezusin. Por kur ata arritën, nuk mund t’i afroheshin, sepse Ai ishte i ulur në mes të një rrethi të madh njerëzish. Ata u kërkuan njerëzve që të përcillnin një mesazh tek Ai. Më në fund, mesazhi mbërriti në veshin e Zotit. Përgjigjja e Tij ishte tërësisht e papritur. Pothuajse dukej e ftohtë dhe e gabuar, veçanërisht sepse familja e Tij ishte shumë e shqetësuar për Të.

Pse reagoi Zoti në atë mënyrë? E dimë që Ai e donte familjen e Tij; sidoqoftë, Ai na mëson që Perëndia është më i rëndësishëm, madje edhe sesa familja jonë e dashur. Kur duhet të zgjedhim, Perëndia duhet të jetë gjithmonë i pari. Ka raste, që çmimi i të qenët i krishterë është që duhet të lësh familjen. Shumë të krishterë e kanë bërë këtë zgjedhje. Le të mos harrojmë të lutemi për ata.

Prapëseprapë, të bëhesh një ndjekës i Jezusit nuk është humbje. Më shumë fitohet, sesa humbet. Mund ta mësojmë këtë nga përgjigjja e Jezusit. Duke u kthyer ngadalë, Ai i quajti njerëzit e ulur përreth Tij “nëna ime, ose vëllezërit e mi”. Pa dyshim që, kur Ai e tha këtë, sytë i shkëlqenin nga dashuria dhe ngrohtësia. Ai i konsideronte të gjithë këta njerëz familjen e Tij. Dhe çfarë prove kishte që ata ishin familja e Tij frymërore? Prova është që ata i bindeshin vullnetit të Perëndisë sikur Ai Vetë po i mësonte (vargu 35). Vëllezërit dhe motrat e Jezusit janë vetëm ata, të cilët i binden dhe i besojnë Atij, e duan dhe dëshirojnë ta nderojnë Atë. Le të jemi të paralajmëruar: thjesht të qenët pjesë e kishës nuk ju bën vëlla apo motër të Jezusit.

Sa e veçantë është të jesh në familjen Jezusit! Është e mrekullueshme të kesh një baba të mrekullueshëm dhe një mama të mrekullueshme, një vëlla dhe një motër më të madhe, një xhaxha/dajë dhe hallë/teze të veçantë. Por është shumë më mirë të kesh Zotin Jezus si vëlla! Pse? Ai është i aftë të na shpëtojë nga pushteti i fajit dhe i mëkatit; familja jonë e gjakut nuk mund ta bëjë këtë. Ai është i aftë të na ndryshojë zemrat, ndaj mund ta duam dhe t’i shërbejmë Zotit. Ai është i aftë të sigurojë për të gjitha nevojat që kemi.

A do të jeni të mirëpritur në “rrethin e Tij familjar”? Zoti Jezus kurrë nuk e largoi asnjë prej atyre që dëshironin të qëndronin me Të. Jini të bindur që kur i luteni Atij, Ai është i gatshëm t’ju pranojë. A do të thoshte: “Do të më kërkoni dhe do të më gjeni ...”, e më pas, të mos shfaqte gatishmëri t’ju pranonte? Gatishmëria e Tij për të na pranuar duhet të na japë zemër, edhe kur e dimë që e kemi trishtuar thellësisht me mëkatet tona.