Христ мэндэлсэн өдрийн найдварЗагвар

Есүсийн төлөө хол зам туулах юу ч биш

Матай 2:1-р эшлэлийг унш.

Үнэнийг хайна гэдэг бол хагас цагийн ажил биш. Үүнд танд байгаа бүхэн чинь хэрэгтэй болдог. Христ мэндэлсэн баярын түүхэнд мэргэд үүнийг бидэнд заадаг.

Үнэнийг олохын тулд мэргэд ямар ч хол замыг туулахад бэлэн байсан. Матай 2:1-р эшлэлд ийнхүү хэлсэн байдаг, "Есүсийг төрсний дараа, дорно зүгээс мэргэд Иерусалимд хүрч ирээд". Есүсийг олохын тулд мэргэд маш их зардал гарган, Дорнодоос Ойрх Дорнод руу хэдэн зуун бээрийг туулсан байх гэж бид таамагладаг.

Иерусалимээс ердөө л зургаан бээрийн зайтай орших Бетлехемд Есүс төрсөн. Есүсийг төрөх үед, Иерусалим бол дэлхийн сүнслэг байдлын төв цэг нь байсан. Иерусалимд олон төрлийн сүнслэг үйлдлүүд хийгддэг байсан. Дэлхийн сүнслэг байдлын бүхий л том удирдагчид Иерусалимд байдаг байсан боловч тэдгээрээс нэг нь ч Есүсийг хайж ирээгүй. Зөвхөн харийнхан — огт өөр соёл заншилтай хүмүүс болох Мэргэд — Есүсийг хайж байсан.

Херод хаан Есүсийг олоогүй. Бетлехемийн бизнес эрхлэгчид ч бас олж чадаагүй. Хэрэв та Түүнийг хайхгүй бол та ч бас Есүс яг хажууд чинь байсаар байхад Түүнийг олохгүй байх боломжтой.

Гэвч Мэргэд Есүсийг хайж байв. Есүсийг олохын тулд тэд шатам халуун цөлийг туулан дөрөв таван сар аялахад бэлэн байжээ. Бурханыг эрж хайх тал дээр тэд шийдвэрээ бат гаргасан байв. Түүнийг олохын тулд шаардлагатай бүхнийг хийхэд тэд бэлэн байсан.

Энэ бол үнэхээр ухаалаг зүйл. Үүний адилаар бид ч бас ийнхүү үйлдэх хэрэгтэй. Бурханыг хайхад ямар ч зүйлд саад хийх боломжийг бид олгож болохгүй. Энэ бол дэлхий дээрх хамгийн чухал амжилт мөн.

Тэнгэрийн улсын хаанчлал бол үнэтэй сувдтай адил бөгөөд үүнийг олж авахын төлөө бид байгаа бүхнээ ч зарах болно хэмээн Есүс хэлсэн байдаг. Энэ сургаалт зүйрлэлийг Есүс ярихаас ч өмнө Дорнодын Мэргэд үүнийг аль хэдийнээ ойлгосон байсан мэт харагдаж байна.

Есүсийг магтан хүндлэхийн тулд Мэргэд байгаа бүхнээ ч орхиход бэлэн байв. Тэд гэр орныхоо тохь тухаас татгалзан урт удаан бас хүнд хэцүү аянд гарахад бэлэн байсан, учир нь Есүсийг хайх зөв зүрх сэтгэл тэдэнд байсан. Тэд Түүнийг магтан хүндлэхийг л хүссэн.

Есүсийг магтан хүндлэхийн тулд та яг юунаас татгалзаж чадах вэ?