Nofinofy natsangana indraySantionany

Misy andininy izay ao amin'ilay vavaka mangina fatao mandritry ny fivoriana misy ambaratonga 12 izay mangataka an'Andriamanitra hanampy antsika hanaiky fa "Ny fahasarotana no làlana mankany amin'ny fiadanana; mandray an'izao tontolo izao sy ny fahotany, tahaka ny nataon'i Jesoa, amin'ny tena endriny tokoa fa tsy araka izay tadiaviko ho hita”.

Nanamarika ahy hatrany io tonom-bavaka io satria nandany erijika be aho niezaka nanamboatra sy nifehy ireo trangam-piainana sy ireo olona nanodidina ahy mba hahazoako ilay fiainana tadiaviko.... Miezaka ny mba hahatanterahan'ny nofinofiko. Hita nefa fa tena tsy nandaitra akory izany rehetra izany.

Tao aorian'ny fisaraham-panambadiako, dia tsy nanana trano intsony aho, nahatsapa tena ho afa-baraka aho ary tsikelikely dia toa nianjera tsirairay avy ireo arofaninana izay noeritreretiko afaka mbola nitazona ny fiainako. Tsy nanana na inona na inona ianteherana intsony aho. Tsy tahaka ilay mba noeritreretiko mihitsy ny fiainako.

Indray mandeha, raha iny tena vaky fo be iny mihitsy aho ny amin'ny mahazo ahy dia nikiakiaka tamin'Andriamanitra aho hoe: “Tsy misy nandeha araka izay nieritreretako azy mihitsy ny fiainako”. Nihaino ahy Andriamanitra. Ary avy eo, dia nibitsika tao am-poko Izy hoe:

Namonjy anao Aho.

Toa teny foana sy tsy nisy dikany akory izany fehezan-teny izany tamin'izany satria tsy nisy na inona na inona izay niseho tamin'ny fiainako izay niendrika famonjena akory.

Harmony, Namonjy anao tamin'ny fiheveranao ny amin'ny nofinofinao aho... Hanavao indray ny nofinofinao Aho.

Ity teny fikasana ity, hoe ho havaozin'Andriamanitra indray ny nofinofiko, hanangana indray ny fianakaviako Izy dia nitondra fanantenana ho ahy fa tsy haharitra ela intsony ity fotoana manjombona mahazo ahy ity. 

Fantatro fa tena Mpanangana tokoa io Andriamanitsika io. Voalohany dia nanasitrana ny tantarako izay feno ratra Izy ary nampiasainy hikasika fiainan'olona maro tamin'ny alalan'ny Treasures izany. Ankehitriny, taona maro tao aorian'ny fisaraham-panambadiako, dia sahiko ny milaza fa nanavao indray ny nofinofiko hanana fianakaviana milamina indray Izy. Tamin'ny volana Marsa 2014, dia nanambady lehilahy mahafinaritra be aho, tia sy dada faharoa an'ilay zanako vavy kely! Tamin'ny volana Janoary 2018, dia niteraka zazalahy kely izay nitondra fifaliana goavana be tamin'ny tokantranonay izahay.

Tiako ny tantaran'i Josefa, satria dia tena ohatra mivaingana ny amin'ny mpanonofy izay nahatoky an'Andriamanitra hatramin'ny farany izy, na dia toa efa rava sy potika izany aza ny nofinofiny. Nivadihan'ny fianakaviany izy, nilaozana, namidy, noandevozina, nogadraina ary noadinoina. Nandritra izany sedra rehetra izany anefa, dia niaraka taminy foana Andriamanitra. Raha ny marina, ny fahamarinana izay nananany ny amin'Andriamanitra dia namela azy hihoatra ireo sedra izay nolalovany sy hamonjy ny fianakaviany sy ny tany Egypta ny amin'ny mosary. Nampiasa ireo singa rehetra tamin'ny fiainan'i Josefa Andriamanitra ary nampiasainy ho amin'ny tsara! Nanangana indray ilay nofinofiny Andriamanitra. 

Manontany tena ihany aho hoe mety efa kivy sy tsy te hierika intsony ny nofinofiny ihany koa ve Josefa? Tsy izany nefa, fa nijanona ho mahatoky hatrany izy raha nisedra ireny fotoan-tsarotra sy sedram-piainana mangidy ireny, ary navelany Andriamanitra hampiasa azy, ary nanohy nanonofy hatrany izy. Firenena iray no novonjena noho izy nijoro ho nahatoky hatrany.

Tsy fantatro izay iainanao amin'izao fotoana izao. Tsy fantatro hoe inona daholo ireo sedra izay mamely ny nofin'Andriamanitra ho anao. Fa ny hany fantatro dia izao—Andriamanitra dia Mpanangana. Mahatoky Izy. Minoa hatrany, mahatokisa hatrany, mifikira hatrany ary aza mijanona manonofy… 

Andriamanitra hanangana indray ilay nofinofinao. 

Fanamarihana avy amin'i Harmony:

Manantena aho fa nahafinaritra anao ity fampaherezam-panahy ity! Maniry ny hampahery anao hatrany aho ny hiaina fiainana anaty fahafahana tanteraka, hananana nofinofy lehibe ary ny mba hahatanterahany izany! Manasa anao aho hitsidika ny blaogiko ao amin'ny https://harmonygrillo.com/">www.HarmonyGrillo.com. Raha maniry ny hahafantatra misimisy kokoa miksika ny Treasures ianao dia afaka mitsidika ny https://www.iamatreasure.com/">www.iamatreasure.com.