Nofinofy natsangana indraySantionany

Andro Asabotsy maraina izay dia variana nandinika ny zanako vavy kely 3 taona natory aho. Tsy andriko ery ny hamoha azy, satria efa nanomana ny sakafo maraina izay tiany indrindra aho ary nikasa ny hitondra azy hijery horonantsary sy ihinana glasy miaraka amiko.   

Nakisako moramora ny volony ary nosafosafoiko ny takolany. “Mifohaza amin'izay akia ry zanako malalako an,” hoy aho nibitsibitsika azy.   

Tampoka teo, dia nikofofofoka be mihitsy ny tanany sy ny tongony no sady tezitra be izy. “Aaa! 'Zaho tsy te hifoha,” hoy izy sady nasiaka no nanao tarehy ratsy ahy. 

Vaky be ny foko. Sady very hevitra aho noho ny fihetsiny tezitra be teo, no nalahelo fa mety tsy ho tanteraka indray ilay fikasako mba hitondra azy amin'ny toerana mahafinaritra anio. 

Mbola te hijanona eo ambony fandriana ny zanako vavy, ary mbola tsy te hiala eo amihitsy aloha. Mbola tamana tao anaty toromaso izy. Nanjary tsy nisitraka ilay fotoana mamy izy noho ilay fanoherany masiaka be teo. Tsy ho vitako intsony ny hitondra azy hivoaka tao aorian'ireny fikizitinany be ireny. Raha mba fantany mantsy ireo zavatra nomaniko ho azy, dia mety mba hafa ve ny fihetsiny? Raha nahatoky ny fandaminako izy, raha nahatoky ahy izy, mety hafa ve ny zavatra nitranga teo? 

Manontany tena ihany aho raha tsy afaka nisitraka ireo planina efa nomen'Andriamanitra ho ahy, noho izaho mety mbola tamana loatra tamin'ny toerana izay misy ahy. Variana loatra amin'ireo filana notadiaviko. 

Misy fotoana isika maniry an'izay mahafinaritra ny fontsika any, ary mieritreritra avy eo fa tena ilaintsika iny. Fa raha tena mahatoky isika fa Tsara Andriamanitra ary tena tsara ny Fitondrany, dia hihaino Azy isika. Hanaraka Azy isika— na dia mety hoe mifanohitra amin'ilay noheverintsika aza ny zava-miseho ary mety hampiala antsika amin'ilay toerana nahatamana antsika. Eny fa na dia midika aza izany fa mila ajanona amin'izay ireo fiarahana sasany, fahazarana sasany na alahelo izay mety mbola mitazona antsika.   

Ny fananana fahatokisana no tena fototry ny Finoana—ny hoe mino an'Andriamanitra dia mahatoky ny Fitondrany, eny fa na dia tsy azontsika tsara aza ilay izy. Io ihany koa ny fototry ny nofin'Andriamanitra ho an'ny fiainantsika. Tamin'ny fotoana nahatsapako fa ohatran'ny feno faharavana izany daholo ny fiainako, dia ny fahatokisako an'Andriamanitra no mbola nampijoro ahy. 

"Mifohaza ry malalako. Sokafy ny masonao. Avia miaraka amiko. Misy zavatra mahafinaritra nomaniko ho anao. Fa mba hiainanao an'ilay izy dia tsy afaka ny hijanona eto ianao. Efa fotoana hiovana toerana amin'izay izao ry ilay tiako." 

Mino aho fa manasa antsika sy ianao Andriamanitra ary hitondra antsika amin'ny planiny izay tsara lavitra noho izay mety efa neritreretintsika. Planina izay hitondra Fananganana sy Fanavotana amin'ireo rehetra mety very sy nangalarina. Ny fanontaniana dia hoe, moa mahatoky Azy tsara ve ianao ka vonona ny hanara-dia Azy?