Nofinofy natsangana indraySantionany

Ny nankalazako ny fetin'ny Reny voalohany indrindra, Ilay andro iray izay noeritreretiko hoe ho henika voninkazo sy fihetseham-po tsy ho hay tantaraina. Kanjo tsy izay no niainako, fa andro iray izay nitsoran'ilay vadiko tamiko ny fampirafesany ka nitarika ny faharavan'ny fanambadianay. Ankona tanteraka sy nalahelo loatra aho ka dia tsy nahavita nikarakara ny zanako vavy kely akory ny 24 ora nanaraka an'izay. Mba tsara sitrapo ireo namako ka nikarakara azy nandritra iny alina iny.

Rehefa tonga naka ny zanako aho ny maraina, dia nigogogogo nitomany tao amin'izy ireo ary nitaraina mafy hoe: " Izaho no vady nampakariny. Nifanaiky teo amin'ny alitara izahay. Tokony hiaraka hitaiza ny zanakay sy hanana zafikely izahay. Izahay no tokony handrava ny ozon'ny fisaraham-panambadiana anivon'ny fiainakavianay. Tokony hiara-dia mandra-pahantitray izahay.”

Nangorako ary nihaino ahy tanteraka ilay namako mialohan'ny nanaovany fanamarihana. “Harmony, ohatrany efa nanao kisarisary ny tokony ho fiainanao izany ianao. Haiko fa mafy be izany, mety fotoana izao hamelanao tanteraka an'izany sarisary izany ary hatoky an'Andriamanitra hanao sary vaovao ho anao”.

Marina ny azy. Tsy nalahelo ny fiainako fotsiny aho fa nalahelo ihany koa ilay fiainana izay novinavinaiko ho tokony niainako. Alahelo tambonin'ny alahelo. Ny akamaroantsika dia efa nanao sarisary ihany koa ny amin'ny tokony ho fiainantsika. Manao sarisary ao an-tsaintsika isika ny amin'ny mariazintsika, ny zanantsika, ny asantsika, ireo namantsika ary indraindray dia mametraka andro ny amin'ny hahatanterahan'ireo.

Tena tsara ny manana vina, fa inona no miseho rehefa tojo fahadisoam-panantenana an'izao fiainana izao ny nofinofintsika sy ireo hetahetantsika? Noho ny famoizana olona akaiky antsika, ny faharavan'ny tokantranontsika, ny fahaverezan'ny asantsika? Ahoana no avalintsika? Ho tezitra amin'Andriamanitra ve isika? Hianina tsy hanonofy intsony ve isika satria marary loatra ilay diso fanantenana? Sa, ho vonona kosa ve isika ny hanokatra ny tanantsika ary hamela tanteraka ny fiainantsika eo an-Tanany.

Izaho ihany koa dia nanao kisarisary ny tokony ho fiainako, fa fantatro amin'izay taty aoriana fa hay tsy maharitra ilay kisarisary nataoko raha oharina amin'ilay nataon'Andriamanitra ho ahy.

Mety ho tonga ho toy ny sampy ny nofinofin'ny saina. Miseho izany rehefa apetrantsika amin'ny sarisary izay nataon'ny saintsika ny fahatokiantsika. Moramora kokoa amintsika ny mametraka ny fahatokiantsika amin'ireo zavatra izay hitantsika sy azontsika fehezina noho ny mametraka izany amin'Andriamanitra izay tsy hitantsika sy tsy afaka ny ho fehezintsika.

Mety hampatahotra ny fiarahana marina sy ny fifandraisana akaiky. Mety hampatahotra ny fanasitranana. Ireny rehetra ireny dia mitaky fahatokisana sy fahasahiana ny handeha miaraka amin'Andriamanitra na dia any amin'ny làlana tsy dia mahazatra, izay tsy mbola tsy noeritreretintsika akory. Fa Andriamanitra, ilay Andriamanitsika, dia maniry ny hiaraka amintsika hamakivaky ity fiainana ity. Handravona indray ireo làlana mikitoantoana Izy ary hitondra hazavana ao anaty haizina.

Raha avelantsika hiditra ao am-pontsika ny fahazavan'Andriamanitra, dia afaka ny haneho amintsika ny fototr'ireo aretintsika ireo, ary izay hiasa amin'izay ny fanasitranana. Amin'izay fotoana izay vao afaka ny hamantatra isika hoe inona no nanosika antsika hiafina tao ambadik'ireny fanirian'ny saina ireny. Amin'izay fotoana izay isika vao afaka ny hamototra tanteraka ny tondrozotran'ny fiainantsika araka an'Andriamanitra, hahalala fa manao mihoatra Izy, izay mihoatra lavitra noho izay rehetra angatahantsika, eritreretintsika na saintsika!