Nofinofy natsangana indraySantionany

Tsy nampoiziko mihitsy hoe mbola hahatratra an'izany faha-21 taona izany aho. Nisedra fanararaotana ara-nofo, herisetra ara-batana ary niaina tao anaty tokantrano nikorontana ambony ambany aho. Tamin'izaho 13 taona dia nilaozan'ny reniko izaho sy ny zokiko lahimatoa izay 18 taona tamin'izay. Feno jiolahim-boto ireny nanodidina anay. Nandritra ny fotoanan'ny fialan-tsasatra, dia nifanerasera tamin'ny tovolahy iray zokiko kelikely fotsiny amin'ny taona, dia izy no nanome anay sakafo sy mba niaro anay teny. Nanomboka niaran'ny herisetra tsikelikely nefa izaho tao anatin'izay fiarahana izay ary ny niafarany dia lasa nampiasa ny vatako ho fitaovana aho ary tonga toy ireny makorelina ireny. Lasa niankin-doha tanteraka tamin'io sipako io aho ary tena nikorontana tanteraka ny fiainako. 

Niditra i Jesoa. 

Tao Aminy no nahitako ny Fahasoavana, ny Fanasitranana, ny Famindram-po ary ny lalana izay nitondra ahy tamin'ny fahafahana. Niverina nanonofy indray aho. Nanonofy aho hoe indray andro aho dia hanana trano mifefy tamboho fotsy miaraka amin'ny zaridaina sy bozaka miloko maitso tsara ary miparitaka eraky ny tokontany ny kilalaon'ireo zanako. Nanonofy hanana tokantrano tonga lafatra aho. Naneho ny fitadiavako fiarovana sy filaminana ny nofinofiko - satria tsy mba niainako ireo tamin'izaho mbola kely.

Nanana fiheveran-diso aho hoe rehefa makany am-piangonana isaky ny alahady, mamaky ireo boky izay tokony ho vakiako, manao an'izay tokony atao, dia ho tanteraka ny nofinofiko rehetra, ary manana ny fiarovana manokana avy amin'i Jesoa aho ka tsy hisy loza na tranga ratsy hahazo ahy intsony. 

Nandritry ny herintaona, dia nandeha araka izay nieritreretako azy mihitsy ny fiainako. Nanambady aho ary nanan-janaka mahafatifaty kely. Nanana ny tranonay izahay ary nisy tokontany malalaka azo ilalaovana tsara teny ivelany. Tsara loatra ny fiainako ka na dia izaho aza dia nitsiriritra ny tenako ihany! 

Rehefa fantatro fa hay nampirafy ahy ny vadiko ary tsy vonona akory izy ny hiady ho an'ny tokantranonay, dia very fanantenana tanteraka aho ary tonga nanjombina tamiko ny rehetra. Rava tanteraka ireo nofinofy izay nananako. 

Ao anatin'ny tononkalony, “Harlem”, dia mametraka izao fanontaniana izao i Langston Hughes. “Inona no mahazo ny nofy rehefa iny ahemotra indray iny izy?”  

 “Miamaina ve izy

      toy ny voaloboka atampy amin'ny masoandro?

      sa miamitsonika—

      sa tonga mandositra?”

Mino aho fa ny tranga izay hiseho amin'ny nofinofy izay nahemotra, na noravana, na toa tsy tratra mihitsy dia miankina betsaka amin'ilay mpanonofy. Ny valintenintsika no hamaritra na hanakaiky kokoa ilay nofin'Andriamanitra ho antsika isika na manalavitra azy.

Raha hiverenantsika ilay tranga nahazo ny tokantranonay teo, dia tojo fanapahan-kevitra goavana aho…

Aiza ary no ametrahako ny fanantenako? Hapetrako any amin'ny nofinofiko ve ny fanantenako? Sa ho apetrako eny am-pelatanan'Andriamanitra?

Ny baiboly dia milaza fa ny fanantenana mihemo-dava dia mankarary fo; fa ny fanantenanan ao amin'i Jesoa kosa mampahazo aina. Tsy afaka ny hanova ny tantara izay niainako mihitsy aho, fa izaho kosa dia afaka manapa-kevitra ny amin'ny valinteniko amin'izay. 

Manasa anao aho handinika ireto fanontaniana manaraka ireto: Aiza ny fanantenanao no mitoetra amin'izao fotoana izao? Any amin'ny nofinofinao ve? Sa any amin'ilay Mpanome Ny Nofinofy?