Afaho amin'ny fampitahana ny tenanao - Fampaherezam-panahy mandritra ny 7 andro miaraka amin'i Anna LightSantionany

Rehefa mampitaha ny tenantsika amin'ny hafa isika ary mahatsapa tsy fetezana ny amintsika dia tokony hametraka fanontaniana amin'ny tenantsika ihany isika hoe: Moa ve ny zavatra tadiaviko hitranga ho ahy mety hiseho ihany raha misy fiezahana miainga avy aty amiko? Moa ve io zavatra mampialona ahy io mety ho zavatra irian'Andriamanitra hatao eo amin'ny fiainako? Mety tsy tokony hampangiana foana ny feon'ny fifampitahana sy ny fialonana isika. Mety tokony entintsika am-panetren-tena eo anatrehan'Andriamanitra tokoa ireny ary hangatahana ny Fitarihany. 

Mety tsy afaka ny hanova ny bikanao ianao, fa mety afaka ny hanala an'ireo kilao mihoatra izay tsy tianao ireo ve nefa? Mety afaka ny handoko indray ny lakozianao mba ho toy ny vaovao indray ve ianao? Mety tokony hamerina ny fifandraisana tamin'ny fiarahana simban'ny halaviran-tany ve? Mila manatona zoky hanampy sy hanome torohevitra amin'ny resaka tokantrano sy fanambadiana ve? Mila miezaka hampivoatra sy hampitombo ny tena dieny mbola mpitovo ve? Mila mitantana tsara ny vola mba hananana misimisy kokoa ve? 

Mety ampiasain'Andriamanitra tokoa ve io fifampitahana sy fialonana tsapanao io hanondroana anao izay làlana tokony alehanao?

Efa nitranga tamiko izay zavatra izay. 

Nisy ankizy vavy niara-lehibe tamiko izay ohatry ny nanana ny rehetra mihitsy izy tamin'ny fiainany. Sady tsara tarehy be izy no navitribitrika be no sady nalaza sy fantatrin'ny olona rehetra. Nampitaha ny tenako taminy aho ary nieritreritra fa raha mba ohatr'azy izao aho dia mety mba ho tia ny tenako ihany. 

Tamin'ny fanarahako hatramin'ny hatsimpiriany ny fiainan'izay ankizivavy izay no nahitako zavatra iray izay tsy niova mihitsy teo amin'ny fiainany...

dia Jesoa izany. 

Nazava be fa ny loharanon'ny heriny, ny fanantenany sy ny fahatokiany dia avy amin'ny Hery izay lehibe lavitra noho izy; ary ny vaovao mahafaly dia afaka nisitraka an'izay hery izay ihany koa aho raha manao ny ezaka izay tokony ilaina ny amin'izany. Ka izany indrindra no nataoko.

Taona maro taty aoriana dia naharay antso tamin'ny ankizivavy iray izay aho izay nitsotra tamiko fa nialona ahy hono izy. Hoy izy tamiko hoe: "Izao foana no lazaiko amin'ny tenako hoe: raha mba ohatr'i Anna izao aho dia mba ho tia ny tenako amin'izay." 

Afaka nilaza azy ilay nambaran'Andriamanitra tamiko aho hoe: " Tsy maniry ny hitovy ohatr'ahy ianao. Ny fanirianao dia ilay fahafahana hitanao, ary ny vaovao mahafaly dia afaka ny misitraka azy io ianao raha manao an'izay ezaka tadiavina amin'izany." 

Raha ny marina dia, rehefa malaky manao fampitahana miainga amin'ny zavatra hitantsika avy ety ivelany isika dia manjary tsy mahita ny toe-po sy ny tantaran'iny olona iny tokoa.

Talohan'ny nahafantarako izany dia nitahiry lolom-po be aho noho ny asa izay nataon'Andriamanitra tamin'ny fiainan'ny hafa, indrindra indrindra raha toa ka nahomby iny olona iny. Tsy hoe tsy faly tamin'ilay izy fotsiny aho fa tsy nanaiky mihitsy aza. Loza be tamiko mihitsy ilay izy. Ny mankalaza ny asan'Andriamanitra amin'ny fiainan'ny olona nefa dia tsy mampihena akory ny asan'Andriamanitra amin'ny fiainanao. Raha ny marina, NY TSY fankalazana ny asan'Andriamanitra amin'ny fiainan'ny hafa no mety hanova ny finiavan'Andriamanitra hiasa amin'ny alalanao. Raha toa ka mahatsapa an'izay lolom-po izay ianao manoloana ny fahombiazan'ny hafa dia ravao amin'ny teny fampaherezana izany manda izany ary anontanio ny tenanao hoe inona no ezaka mila angatahina avy aminao? 

Misy trangan-javatra mampalahelo ve amin'ny fiainanao ary manana fahefana ny hanova an'izay ianao? 

Inona no manakana anao tsy hiroso amin'izay fiovana izay? 

Tompo o, maniry ny hitondra an'ireo fifampitahana sy fialonana izay tsapako ato anatiko ato eo anatrehanao aho ary mangataka fitarihana avy aminao. Manondro ahy làlana izay tokony alehako ve ianao? Sokafy ny masoko ahitako izay tianao lazaina amiko amin'izao fotoana izao. Ampio aho ho tonga fampaherezana ho an'ny hafa, ary aoka hahatoky hatrany fa tianao toy ny olona rehetra aho.