Afaho amin'ny fampitahana ny tenanao - Fampaherezam-panahy mandritra ny 7 andro miaraka amin'i Anna LightSantionany

Inona no antsoina hoe fampitahana?

Ny Fampitahana dia fomba sy karazan’endrika izay maneho tsy fahatokisan-tena. Ary avy amin'ny tsy fahampiana izany. Tsy ampy fanehoana ny maha-izy azy. Tsy ampy tanjona. Tsy ampy fahatokisana ny amin'ny hoe iza isika sy tsy mahatoky ny fiainana izay nomena antsika.

Ny tsy fahatokisan-tena dia avy amin'ny finoantsika lainga sy tsy fahafantarana na tsy finoana ny tena maha-izy azy marina antsika. Izany hoe rehefa mampitaha ny tenantsika amin'ny hafa isika, dia toy ny milaza hoe: "Izaho dia tsy mahafantatra na tsy mino hoe iza marina aho, ary izaho dia tsy mahafantatra na tsy mino hoe iza Andriamanitra."

Mampitaha ny tenantsika amin’ny hafa isika satria maniry ny hahatsapa fa misy fiarovana azontsika ianteherana ivelan'ny tenantsika. Na fantatsika na tsy fantatsika dia isika rehetra izao dia samy mikaroka ny toerana izay misy antsika amin'ny ambaratongam-piainana. Maniry ny hahafantatra ny toerantsika eto amin’ity fiainana ity isika, aiza isika no solafaka, ary manao ahoana isika raha oharina amin’ny hafa satria tsy mahatsapa ho misy fiarovana isika, fiarovana izay tokony ho avy ao anatintsika.

Marina fa ny sasany amintsika dia mampitaha ny tenantsika amin’ny hafa noho ny tsy fahatokisan-tena. Ny olona izay mampitaha ny tenany amin’ny hafa dia tsy mahatsapa fa voatahy sy nomena talenta ary fahaizana manokana izany fa variana loatra mijery ny fiainan’ny hafa. Misy ihany koa ny ankamaroan’ny sasany izay mampitaha ny tenany amin’ny hafa noho ny toetrany tia mifaninana sy te ho lohany foana. Ny fananana ny toetra A dia manana izay toetra izay ao amin’ny natiorany mihitsy. Matetika dia ny azy foana no tsara indrindra rehefa manao zavatra, mpitarika sangany, ilay mpitarika lehilahy na vehivavy alfa amin’ny vondrona izay misy anareo. Koa ny fironan’ny toetranao mampitaha ny tenanao amin’ny hafa dia avy amin’ilay fanirianao ny ho lohany amin’ny zava-drehetra. Rehefa ianao no sangany indrindra dia mahatsapa ho manana fiarovana manokana izany ianao, saingy io fahatsapanao io dia mandalo fotsiny ihany. Na inona na inona antony mahatonga antsika mampitaha ny tenantsika amin’ny hafa dia tsy maintsy manaiky isika fa ny fampitahana dia tsy hitondra amin'ny fanetren-tena izay sitrak’Andriamanitra mihitsy.

Ny fampitahana dia mpangalatra ihany koa. Renao matetika ny hoe: "Mamono ny fahaizana mianina amin’izay ananana ny fampitahana." "Ny fampitahana dia mpangalatra fifaliana." "Ny fampitahana dia mamono ny fiantraikano amin’ny hafa."

Ny fampitahana dia mangalatra, mamono ary manimba ny saintsika sy ny fontsika. Hitantsika amin’izany fa tena fitaovan’ny fahavalo mihitsy izy io. Ny fahavalonao dia tena mankahala anao fatratra ary ho ataony ny fomba rehetra hanakelezana an’ilay fiainan'Andriamanitra ao anatinao ao, ilay fiainana be dia be izay nampanantenainy ho anao. Rehefa milefitra manoloana ny fampitahana isika dia manome alalana ny fahavalo hiditra amin'ny fiainantsika ka tsy afaka ny hiaina feno ny efa nomanin’Andriamanitra ho antsika isika.

Mety tsy fanahy iniantsika ny mampitaha ny tenantsika amin’ny hafa saingy ny fakam-panahy sy ny loza ateraky ny fampitahana dia eo anoloantsika hatrany satria dia tena fahotana tokoa izy io. Nefa toy ny amin’ny fahotana rehetra, dia mila manokana ny fomba fiainantsika isika ho lavitry ny ota sy ny fampitahana.

Mampitaha ny tenantsika amin’ny hafa ve isika satria tsy mahatoky tena sa satria te ho lohany foana isika?

Tompo o, miaiky aho fa tena fombako ilay mampitaha ny tenako amin'ny hafa. Misy fotoana ilay izy ataoko tsy ampiheverana. Te hahafantatra misimisy kokoa aho hoe iza Ianao ary iza aho noho Ianao. Maniry ny hanana fahatokisan-tena ao anaty izay azo avy amin'ny fifandraisako manokana aminao aho. Tadiavo ny foko ary asehoy ahy ny fototry ny adiko amin'ny fampitahana ary manafaha ahy amin'ny anaran'i Jesoa!