Afaho amin'ny fampitahana ny tenanao - Fampaherezam-panahy mandritra ny 7 andro miaraka amin'i Anna LightSantionany

Matetika dia mampitaha ny tenantsika amin'ny hafa isika ary manatsoaka hevitra avy eo fa tsara kokoa noho izy ireo, nahavita mihoatra, tsara kokoa, tsara bika kokoa, manam-bola kokoa, misy mpanaraka betsaka kokoa. Ary dia mahatsapa fa tena ambony kokoa izany isika.

Ny olana amin'izay fahatsapana ho ambony kokoa izay dia miorim-paka avy amin'ny avonavona izy io ary fantatsika tsara ao amin'ny Baiboly fa ny vokatry ny fiavonavonana dia fahalavoana.

Ny olana amin'ny fampitahana ny tenantsika mba hahatonga antsika hahatsapa ho ambony kokoa noho izy ireo dia tsy maintsy hisy olon-kafa ho lasa lavitra kokoa foana, olon-kafa heverintsika ho tsara tarehy kokoa, metimety kokoa, manana trano lehibe kokoa, manam-bola kokoa, betsaka mpanaraka kokoa. Izay no antony mahatonga ny hoe ny vokatra faharoa ateraky ny fampitahana dia ny fanimbana ny fontsika.

Rehefa mampitaha ny tenantsika amin'ny hafa isika dia mahatsiaro tsy fahampiana ka mahatsapa ho ambany kokoa. Izay fahatsapana ho ambany izay dia miorim-paka amin'ny tsy fahatokisan-tena. Efa mihoatra ny fefin' ny fanetren-tena izy io ary mampiditra ao an-tsaintsika eritreritra miiba, ahiahy ary tahotra. Mamandrika antsika io toetra io satria mangenja antsika ao anatin'ny fonjan'ny lainga.

Tsarovy fa ny fanetren-tena marina sy tena izy no tena katsahintsika satria izany fanetren-tena izany no sitrak’Andriamanitra ary mitondra voninahitra ho Azy. Hevero ho toy ny mizana marina izy io. Ny tena fanetren-tena no mihazona antsika tsy hirona loatra na avy aty avia na avy aty avanana.

Mba hahazoana ny tena fanetren-tena marina dia mila mametraka ny toetra ambony indrindra izay tokony ho tratrarina ho izay napetrak’Andriamanitra handrefesana hoe aiza ho aiza no misy antsika – ary fantatsika tsara hoe aiza ho aiza isika manoloana Azy.

Ny Romana 3:23 dia milaza amintsika fa “samy efa nanota izy rehetra ka tsy manana ny voninahitra avy amin’Andriamanitra.”

Tsy mahatratra an’ilay fanaperana mihitsy isika! Dia eo indrindra ny fanetren-tena marina – ilay fanetren-tena tena izy – no miseho satria tsy mety mahatratra isika, tsy mahavita tena irery isika.

Hevero ho toy ny zana-tsipika ny fiainanao. Ny mpitana azy dia nanenjena azy ary namela azy hanatratra ny marika avy eo. Ny tanjona mila tratrariny eto dia ny toetra tsara indrindra izay napetrak’Andriamanitra ho an’ny fiainantsika. Manidina eny amin’ny rivotra aloha ilay zana-tsipika, fa avy eo dia mianjera amin’ny tany, nefa tsy nikasika an’ilay tanjona akory. Izay no lazain’ny Baiboly hoe lavo, tsy nahatratra ilay marika.

Ny vaovao mahafaly dia izao: ilay Andriamanitra be fahasoavana sy be fitiavana dia nanolotra antsika an’I Jesoa izay naka ilay zana-tsipika ary manampy antsika hamakivaky ny làlana sisa tavela. Amin’ny alalan’I Jesoa, dia afaka mandia ilay làlana isika, fa mila AZY isika! Mila azy isika tsirairay. Tsy misy mendrika kokoa. Tsy misy ratsiratsy kokoa. Raha ny mikasika ny lanjantsika eo imasony dia tena mitovy daholo isika. Ao aminy no hahitantsika ny tena maha-izy azy antsika sy hahafantarantsika hoe iza marina isika, ho fantatsika ny làlana sy ny tanjontsika ary ilay fiainana be dia be natokany ho antsika.

Ny tena fanetren-tena marina sy maharitra dia azo avy amin’ny fibanjinantsika an’ilay marika tokony ho tratrarina fa tsy avy amin’ny fijerevantsika ny zana-tsipika hafa.

Andriamanitra o, ampio aho hibanjina Anao fa tsy hijery ny ataon’ny hafa na ny lazain’ny manodidina ahy. Ny tena lanjako, ny maha-izy azy ahy sy ny làlako dia avy Aminao irery ihany fa tsy avy amin’ny hafa akory. Maniry ny hanana fanetren-tena marina sy toe-po izay mandeha araka ny sitraponao sy manome voninahitra Anao aho. Asehoy ahy ireo fanaoko izay mety mirona amin’ny fiavonavonana na fanambanina tena ary avereno hifanaraka amin’ny làlanao aho