Afaho amin'ny fampitahana ny tenanao - Fampaherezam-panahy mandritra ny 7 andro miaraka amin'i Anna LightSantionany

Misy antony matoa ianao nisafidy ny hanaraka ity drafitra ity.

Angamba sahirana ny sainao miady amin'ny fampitahana tsy mety tapitra, ilay fenitra izay sarotra tanterahina napetrakao ho an'ny tenanao nefa dia tsy mety tratra mihitsy. Angamba rava ny finamananao noho ny fanirianao hihoatra noho ny hafa foana, na very ihany koa ny fifandraisana akaiky izay nanananao satria ny fampitahana dia nanakana anao tsy ho tonga sakaiza marina sy mpampahery ny namany.

Na mety ho reraka fotsiny ianao.

Reraky ny onjam-pianana izay mameno ny sainao amin'ny tebiteby, ny fisalasalana, ny hakiviana sy ny hatezerana izay nateraky ny fampitahana.

Mieritreritra ianao hoe: " Tsy arako intsony izy izany". Maniry toerana misy fiadanana ianao. Eo amin'io toerana io dia ho tiana noho ny maha-ianao anao ianao, fa tsy noho ny fanananao, na ny zava-bitanao, na ny lazanao, na ny zavatra toy izany. Ho tiana tsy misy arakaraka.

Fantatro izany satria teo amin’io toeranao io ihany koa aho. Tamin’ny fiandohan’ity taona ity dia nanapa-kevitra ny hanao fifadian-kanina nandritry ny telo andro aho. Rano ihany no nosotroiko, ary nitondra am-bavaka an’ireo lafim-piainana vitsivitsy izay mba niriako hihoarana aho. Nanoratra tonom-bavaka vitsivitsy tamin’ny taratasy kely aho ary nametaka izany teo amin’ny fanaka tao an-trano. Tsy nanahirana ahy ny nifoha maraina nivavaka sy nanokana fotoana misimisy kokoa teo amin’ny fanatrehan’Andriamanitra ary nitondra am-bavaka an’ireo vavaka nosoratako tamin’ny taratasy kely ireo… nandritry ny telo andro teo. Vantany vao nifarana ny fifadian-kanina dia toa nifarana ihany koa ny fanokanana fotoana manokana nataoko. Ny tsy nifarana dia ny herin'Andriamanitra niasa tamin'ny fiainako tamin'ny alàlan'ireo vavaka manokana izay napetrako teo an-tongony ireo.

Ny iray tamin'ireo vavaka nataoko tamin’izay dia ny hoe: "Ampio aho hanafaka ny tenako amin'ny fampitahana!" Nahatsiaro ho voasintona nidina ambany aho, resin’ny lanja mavesatra izay tsy hita maso, nohajamben'ny fitsaratsarako ny hafa. Tsy nanaraka ireo olona tamin’ny tamban-jotra serasera izay nahatonga ahy hahatsapa ho ambany noho izy ireo aho. Nanao resaka miiba mikasika an’ireo olona nahatsapako fialonana aho ary tsy mba niara-nankalaza tamin’ireo izay nahavita zavatra lehibe tamin’ny fiainany. Ny hany fiadanana nananako dia ny fitokanana. Rehefa tsy nisy olona intsony nanodidina ahy hampitahako ny tenako dia nahatsapa fa tafapetraka tamin’ny toerana azo antoka aho. Saingy nanorim-ponenana tsikelikely teo ny fanirery ka tonga nihakely ny tontoloko ary nihakely toa izany ihany koa ny fisainako. Nitady ny làlana ivoahana tamin’izany AHO!

Ny drafitra famakiana manaraka dia ny valin-teny izay everiko fa azo mivantana avy tamin'ny seza fiandrianan'ny fahasoavana. Mandritra ny 7 andro manaraka, dia hofakafakaintsika ny fanontaniana toy ny hoe:

Inona no antsoina hoe fampitahana?

Inona no mitranga rehefa mifampitaha isika?

Ahoana ny fomba handresena ny fampitahana? p>

Amin'ny alàlan'ireo valin’ny fandinihana sy famakafakana izay nomen’Andriamanitra nandritry ireo fotoam-bavaka nitadiavako fahafahana ireo, dia mino aho fa hahita fahafahana amin’ny fandriky ny fampitahana ihany koa ianao ary hiaina ilay fiainana be dia be izay efa nomanin’Andriamanitra ho anao.

Tompo o, reraka be aho. Reraka aho fa mahatsapa foana ho tsy ampy, tsy manao firy ary tsy mahavita firy. Ny tontolo manodidina ahy dia manome sehatra be dia be hampitaha ny tenako amin'ny hafa, ary fantatro fa tsy tsara ho ahy izany. Ampio aho hametraka izany eo amin'ny tongotrao am-pahatokiana feno fa afaka manafaka ahy amin’izany Ianao. Maniry ny ho tanteraka tamin’ny namoronanao ahy aho ka tsy misy sakantsakana intsony, amin’ny anaran’i Jesoa.