Afaho amin'ny fampitahana ny tenanao - Fampaherezam-panahy mandritra ny 7 andro miaraka amin'i Anna LightSantionany

Ny fomba tsotra, kanefa tena mamotika indrindra antsika amin'ny fampitahantsika tena amin'ny hafa dia ny tambazotra serasera. Ambarako hoe manapotika indrindra noho ireto antony roa ireto: voalohany, mampiasa azy isan'andro isika, imbetsaka mihitsy aza ao anatin'ny andro iray, ary faharoa dia mazàna mitokana irery isika rehefa mampiasa azy ireny, irery miaraka amin'ny eritrerintsika. Ny mampalahelo dia tsy mbola nisy mihitsy izao olana izao tamin'ny 10 taona lasa. Tafiditra lalina tamin'ny kolontsaintsika loatra ny tambazotra serasera tao anatin'izay 10 taona lasa izay hany ka nitondra aretim-panahy vaovao miparitaka eny amin'ny olona izay mila firaharahina lava dia izay tena mahatsapa ho irery. 

Ilay zavatra izay noforonina mba hampifandray antsika indray no lasa mampitokatokana antsika; ary raha tsy mitandrina isika, dia mety hameno ny fontsika haingana be ny fisainana manapotika izay entin'ny fifampitahana.

Fa nahoana àry? 

Amin'ny ankapobeny dia manana kaonty miisa dimy eo ny olona iray, ao amin'ny tambazotra serasera, ampiasainy hiseraserany ao anatin'ny ora iray sy 40 minitra isanandro.

Dia mbola manontany tena ve isika hoe fa maninona isika no mitolona amin'ny fifampitahana, tsy fahafenoana, tsy fananana fiadanana sy ny tsy fahampiana?

Fa inona moa io ataontsika eo ambany masontsika isanandro io?

Na izany aza dia tsy mino aho hoe ny vahaolana amin'izany dia ny miala amin'ireny tambazotra serasera ireny. Ny devoly no mandray an-tendrony tahaka izany. Mila tsaroantsika fa isika dia eto amin'izao tontolo izao, fa tsy avy amin'izao tontolo izao. Mila mianatra mampiasa ny tambazotra serasera amin'ny zavatra tsara sy hanomezana voninahitra an'Andriamanitra isika.

Mora be amintsika ihany koa ny manao fampitahana ny amin'ny bikantsika sy ny endrintsika ivelany. Mety hoe mijery olona iray fotsiny isika dia tonga dia mitsara sy mampitaha azy noho ny fiakanjony, ny fihaingony, ny fihogony sy ny fikarakarany tena. Misy fotoana mety hoe mba fanamarihana fotsiny ilay izy ary tsy misy eritreritra ratsy avy amintsika mihitsy, ary tsy olana izany. Rehefa diso mampitaha ny tenantsika amin'ny hafa isika noho izay endrika ivelany izay dia eo no tonga tokoa ny olana.

Matetika tokoa dia miseho amin'ny alalan'ny fananana mivaingana toy ny trano, ny fiara, ny karama sy ny fialan-tsasatra ny fampitahana ataontsika. Mijery ny hitantsika maso isika dia ny marika, ny anarana, ny fitafy ary avy eo dia malaky mitsara nefa tsy mahafantatra ny zava-misy rehetra akory. Ny olana amin'izany dia famoronantsika sakana izay mametra ny fifandraisana marina amin'ny hafa. Tonga dia mihevitra mantsy isika hoe tsy mitovy saranga amintsika izy na ihany koa hoe tsy manan-katolotra raha ny fijerintsika azy.

Mampitaha ny traikefam-piainantsika sy ny fahombiazantsika amin'ny hafa ihany koa isika. Maniry ny hanambady ianao kanefa hatramin'izao dia mbola tokan-tena foana. Mitady zaza ianao, na ihany koa mitady fotoana manokana hanalavirana ny tabataban'ny ankizy. Maniry tokantrano tsy mikorontana ianao. Iry vehivavy iry dia tena tsara bika be, ny anao mbola tsy mety afaka foana ilay lanja azo tamin'ny ianao bevohoka dimy taona lasa izay. Miroborobo be ny orinasany, nefa ny anao mikatso tanteraka.

Ny zavatra anaovantsika fampitahana no mampiseho izay tena omentsika lanja. Tsy hoe tonga dia ampanginintsika tsotra izao ny feon'ny fifampitahana sy ny fialonana, raha ny hevitro. Nianatra mantsy aho hoe, afaka ny mampiasa azy ireny ho fitaovana hitarihana ny fiainantsika sy hanazavana ny fandinihantsika tena ihany koa ireny. Hiresaka an'izany misimisy kokoa isika rahampitso.

Tompo o, mba sokafy ny masoko ny amin'ireo zavatra mahatonga ahy hialona. Ampio aho hijery fitaratra tsara ary haka fotoana handinihana izay tena andaniako ny fotoanako. Asehoy ahy hoe nahoana no mahatsiaro matahotra rehefa mahita ny fiainana sy ny fahombiazan'ny olona sasany. Ampio aho tsy hametraka mihitsy ny tenako ho ambony na ho ambany noho ny sasany noho ny bika sy ny endrika ivelany.