ការតមរយៈពេល ២១ ថ្ងៃគំរូ

នេះគឺជារឿងដ៏ជក់ចិត្ដព្រឺព្រួចមួយក្នុងចំណោមរឿងជាច្រើននៅក្នុងព្រះគម្ពីរ។ អ្នកប្រាកដជាអាចយល់នូវស្ថានការណ៍ដែលបុរសវ័យក្មេងទាំងបីនាក់នេះបានឆ្លងកាត់ហើយមើលទៅ--គឺជាពេលដែលគាត់ស្ថិតនៅក្នុងហេតុការណ៍ច្បាស់មួយ ហើយក៏ប្រឈមនឹងសេចក្ដីពិតដែរ។ ហេតុចម្បងដែលច្បាស់ទែង នោះគឺពួកគាត់បានប្រព្រឹត្ដខុសនឹងច្បាប់។ ហើយទណ្ឌកម្មនៃការប្រព្រឹត្ដនោះ គឺត្រូវប្រហារជីវិត។ អធិរាជនេប៊ូក្នេសា គឺជាមនុស្សម្នាក់ដ៏មានអំណាចខ្លាំងក្លាលើសលប់នៅក្នុងពិភពលោក នាសម័យកាលនោះ។ ភ្លើងក៏សន្ទុះឡើងយ៉ាងរោលរាលរហូតដល់អ្នកយាមនៅក្បែរនោះត្រូវរលាកស្លាប់។ ហើយក៏មាននូវពួកអ្នកយាមជាច្រើនទៀត ដែលអាចនឹងបន្តព្យាយាមរុញច្រានពួកគេឱ្យចោលទៅក្នុងឡភ្លើង ដែលកំពុងឆាបឆេះយ៉ាងសន្ធោសន្ធៅនោះដែរ។ ពួកគេមានជម្រើសក្នុងការលុតជង្គង់គោរពក្រាបចុះ ឬត្រូវឱ្យគេដុត។ ជម្រើសមានតែពីរហ្នឹង។ ប៉ុន្តែ សេចក្ដីពិតប្រឆាំងទាស់នឹងហេតុការណ៍ ឬច្បាប់វិន័យនេះ ហើយសេចក្ដីពិតនោះហើយ ដែលនាំឱ្យបុរសទាំងបីនាក់ នៅបន្តឈរយ៉ាងរឹងមាំ មិនរង្គើដែរ។ សេចក្ដីពិតដែលពួកគេជឿនោះគឺថា ព្រះជាម្ចាស់អាចនឹងរំដោះពួកគេ ឬក៏ពួកគេនឹងស្ម័គ្រចិត្ដស្លាប់នៅក្នុងកិច្ចបម្រើចំពោះព្រះអង្គ។ ហើយសេចក្ដីពិត បានស្ដែងបង្ហាញថា មានបុត្រមនុស្សបានដើរជាមួយនឹងពួកគេ ក្នុងគ្រាមានភ្លើងឆេះយ៉ាងសន្ធោសន្ធៅដែរ។ តើមានច្បាប់ ហេតុការណ៍ ឬកត្តាណាមួយ ដែលកំពុងប្រឆាំងទាស់នឹងសេចក្ដីពិតរបស់ព្រះជាម្ចាស់ នៅក្នុងចិត្ដគំនិតរបស់អ្នក ដែរឬទេ? ចូរយករាល់ចំណេះដឹង រាល់ហេតុការណ៍ ច្បាប់ក្រឹត្យក្រមទាំងឡាយណា ដែលប្រឆាំងទាស់នឹងព្រះ យកទៅថ្វាយចំពោះព្រះអង្គ តាមរយៈសេចក្ដីអធិស្ឋាន ហើយចូរជឿទាំងក្លាហានអង់អាច ថាព្រះជាម្ចាស់នឹងគង់នៅជាមួយអ្នក ក្នុងគ្រានៃភ្លើងឆេះយ៉ាងសន្ធោសន្ធៅទាំងនោះចុះ។