Любіць як ІсусУзор

Сэнс у болі

Некалькі гадоў таму мая жонка і я перажывалі вялікі боль, намагаючыся стварыць сям'ю. Сябры ўжо мелі па некалькіх дзяцей... а мы дагэтуль пыталіся ў Бога, чаму нам не ўдавалася зацяжарыць. Чатыры гады пазьней мы, вядома, зразумелі, што нашая бясплоднасьць была часткаю большага пляну. Яна ператварылася ў нешта большае за тое, што мы маглі сабе ўявіць. Але што дапамагло нам змагацца з болем перад тым, як адбыўся цуд? Нашая малая група.

Людзі ў ёй любілі нас як Ісус і штодзённа далучаліся да нас у змаганьні супраць болю і расчараваньня. Яны выразна дэманстравалі нам Псальму 34:18. Бог суцяшаў нас на кожным кроку празь Сьвятога Духа ў нашай малой групе.

Дзякуючы іхняй падтрымцы, мы пачалі публічна дзяліцца сваім досьведам і змаглі распаўсюдзіць Божае паведамленьне аб надзеі іншым парам, якія думалі, што яны былі адны ў сваіх цяжкасьцях. Але Бог на гэтым не спыніўся. Пасьля чатырох гадоў намаганьняў зацяжарыць, ашчадзіць грошы на экстракарпаральнае апладненьне, атрыманьня дазволу стаць прыёмнымі бацькамі і як раз перад тым, як Ён адчыніў нам дзьверы на новую працу амаль што за 16 гадзінаў ад нашай сям'і, Бог адказаў на нашыя малітвы.

Усё зьмянілася за адну сэкунду. Мая жонка была цяжарная! Прайшло некалькі месяцаў, і нарадзілася нашая цудоўная дачка Эма. Угадай, каму мы распавялі пра тое найперш? Нашай малой групе. Яны былі з намі тады, калі нам было гэтак цяжка і балюча, што, здавалася, мы не маглі больш трываць, і яны былі з намі, калі ў нас зьявілася падстава сьвяткаваць!

Супраць чаго змагаесься ты? Калі ты адчуваеш адзіноту, дык ведай, што гэта ня праўда, бо Хрыстос знаходзіцца з намі на кожным кроку і Ён наўмысна месьціць пэўных людзей у нашае жыцьцё. Калі нам нешта баліць, дык некаму ўжо балела тое ж самае. І ў нас ёсьць Збаўца, Які знаходзіцца побач з намі ў найцяжэйшыя часіны. Паколькі мы ведаем гэтую праўду, мы можам паказваць людзям шлях да Таго, Хто ёсьць мацнейшым за іхні боль і здолее даць ім перамогу і нават надаць сэнс іхняму болю. Яго клічуць Ісус.

Наш боль - гэта нашае сьведчаньне. Гэта наш аповед пра Божую вернасьць. Праз боль мы можам давяраць Богу, ведаючы, што Ён любіць нас, знаходзіцца побач, і ёсьць усім тым, што нам патрэбна.

Джэй Портэр
з царквы Life.Church у Келеры