Адвэнт: Падарожжа да РастваУзор

Будзь верным у малых справах

Богу падабаецца дзеяць адрозна ад таго, як дзее гэты сьвет. Ён не шануе людзей з тых самых прычынаў, зь якіх іх шануе сьвет. Ён высока цэніць вернасьць болей за папулярнасьць і пакорлівасьць болей за аўтарытэт. У ноч Свайго найвялікшага цуду, заміж таго, каб найперш абвясьціць пра яго каралям ды лідэрам сьвету, Бог паслаў анёла распавесьці пра гэны цуд простым пастухам авечак. Лукаша 2:8 кажа нам, што тыя пастухі «начавалі ў полі і вартавалі ўначы ля статку свайго». Варта заўважыць, што гэтыя людзі былі адданымі працаўнікамі, якія жылі побач са сваімі авечкамі ды сумленна дбалі пра тое, што ім было даручана. Тыя пастухі мелі нізкае сацыяльнае становішча, але яны былі вернымі людзьмі, і Бог абраў менавіта іх стаць першымі атрымальнікамі найважнейшае навіны ў гісторыі чалавецтва. Потым яны былі першымі, хто асабіста спаткаў Божага Сына!

Калі сёньня вы адчуваеце сябе нязначным альбо думаеце, што ніхто не заўважае таго, што вы робіце, не пераставайце інвэставаць у тое, што Бог даручыў вам рабіць. Нават калі вы адчуваеце, што вашае заданьне малое, рабеце яго ад усяго сэрца. Ня падайце духам! Бог шукае людзей, якія будуць верныя ў малым, каб потым даверыць ім болей. Што б вам ні даручылі рабіць сёньня, рабеце тое сумленна. Бог бачыць вашую руплівасьць і ўзнагароджвае тых, хто верна выконвае заданьні, давераныя ім.

Малітва: Тату, дзякую Табе за тое, што Ты высока цэніш тое, што сьвет, здаецца, не заўважае. Нягледзячы на тое, якімі будуць заданьні, што Ты мне дасі, я абяцаю выконваць іх ад усяго сэрца. Дапамажы мне не абезнадзейвацца ад мерак гэтага сьвету, а заміж таго памятаць, як Ты абраў быў простых, працавітых пастухоў авечак, каб яны першымі даведаліся пра цуд Раства. Дзякую, што Ты абраў мяне – як тых пастухоў – распаўсюджваць Тваю Добрую Навіну. І загадзя дзякую, што Ты дасі мне больш па меры таго, як я сумленна выконваю тое, што Ты ўжо даручыў мне.

Спампуйце сёньняшнюю выяву тут.