Адвэнт: Падарожжа да РастваУзор

Божая любоў да цэлага сьвету

Мудрацы, узгаданыя ў эвангельлі паводле Мацея, былі астролягамі – і гэта тлумачыць, чаму Бог выкарыстаў зорку, каб накіраваць іх да Ісуса. Ён ведаў, што гэткім чынам Ён мог прыцягнуць іхнюю ўвагу. Вельмі магчыма, што гэныя тры мудрацы-астролягі, якіх мы ўлучаем у нашыя калядныя гісторыі, былі чараўнікамі, што тлумачылі прыметы ды знакі, каб здабыць уладу. Існуюць шматлікія тэорыі наконт этнічнасьці ды паходжаньня гэтых людзей з Усходу, але мы дакладна ведаем адно: яны не былі жыдамі. Яны былі паганамі.

Стагодзьдзямі людзі меркавалі, што Збаўца меўся прыйсьці, каб збавіць менавіта жыдоў – народ, абраны Богам. Гэтае меркаваньне ёсьць лягічным, бо іх увесь час прыгняталі навакольныя паганскія народы, якія пакланяліся фальшывым багам. Калі Адзіны Сапраўдны Бог меў намер прыйсьці на зямлю, каб усталяваць Сваё вечнае Каралеўства, то, пэўна ж, Ён зьбіраўся тое зрабіць дзеля жыдоў.

Але калі Бог раскрыў значэньне Ісусавага нараджэньня мудрацам, мы ўпершыню мімаходзь бачым Ягонае жаданьне прымірыцца з цэлым сьветам, нягледзячы на нашае паходжаньне альбо ступень маральнай сапсутасьці. Гэты момант зьяўляецца важным, асабліва для людзей нежыдоўскага паходжаньня. Хоць Ісус і нарадзіўся з чыстым жыдоўскім радаводам і, бясспрэчна, прыйшоў дзеля таго, каб вызваліць тых, якіх Ён абраў ад самога пачатку, Ён таксама прыйшоў, каб усе людзі змаглі аднавіць адносіны са сваім Творцам.

У Дзеях 15 апостал Павал прызнае, што Сьвяты Дух больш ня дзеліць людзей на жыдоў ды паганаў. Кожны, хто верыць у Ісуса, становіцца абраным Божым дзіцём. Затым у лісьце да Каласянаў Павал піша: «… няма Грэка й Юдэя, абразаньня й неабразаньня, барбара, Скіфа, раба, вольніка, але ўсё і ўва ўсім Хрыстос». Ісус сам даў зразумець у Вялікім даручэньні, што Ён жадаў, каб Яго зналі ўсе народы. Ён любіць цэлы сьвет!

<3>Малітва: Ісусе, дзякую Табе за тое, што Ты прыйшоў збавіць сьвет, які так доўга ад Цябе адракаўся. Дзякую за тое, што Ты захацеў пабудаваць адносіны са мной яшчэ тады, калі я быў грэшнікам, адлучаным ад Цябе. Я ведаю, што Ты любіш увесь сьвет, і я хачу быць Тваімі рукамі ды нагамі, дапамагаючы людзям, якія знаходзяцца далёка ад Цябе. Карыстайся мной, каб несьці Тваю любоў да народаў.

Спампуйце сёньняшнюю выяву тут.

Крыніцы: https://www.christianitytoday.com/history/2016/december/magi-wise-men-or-kings-its-complicated.html