Адвэнт: Падарожжа да РастваУзор

Кароль, Бог і Збаўца

У Мацея 2:11 мудрацы прыносяць Ісусу тры добра вядомыя дары: золата, ладан ды сьмірну. Ці вы ведаеце, што гэтыя дары мелі асаблівае значэньне ў Старым Запавеце й шмат чаго кажуць пра Таго, Каму прыйшлі пакланіцца мудрацы?

У Псальме 71:15 золата ўказвае на асобу каралеўскага роду, і гэтак золата пацьвердзіла, што Ісус ёсьць Каралём Каралёў. Ладан зьвязаны з пакланеньнем Богу ў Выхадзе 30:34, таму дар ладану пацьвярджае, што Ісус ёсьць Богам. У Выхадзе 30:22-25 мы чытаем, як сьмірну выкарыстоўвалі, каб памазваць людзей і рэчы дзеля асаблівае мэты. Ісус упершыню атрымаў сьмірну ў падарунак, калі Ён нарадзіўся. Наступным разам Ісус атрымаў сьмірну на крыжы і ў час пахаваньня. Гэты дар указвае на спэцыяльную мэту Ісусава жыцьця: Ён меўся памерці на крыжы, каб збавіць нас ад нашых грахоў, а потым уваскрэснуць, перамогшы сьмерць.

Той верш з Мацея 2 кажа, што калі мудрацы ўбачылі Ісуса, то яны «упаўшы, пакланіліся Яму». Мы пакланяемся Ісусу як нашаму Каралю, бо Яму дадзена «уся ўлада ў небе і на зямлі» (Мацея 28:18-20). Мы пакланяемся Ісусу як нашаму Богу, бо «усё празь Яго сталася, і безь Яго нічога не было з таго, што сталася» (Яна 1:3). І мы пакланяемся Ісусу як нашаму Збаўцу, бо «так палюбіў Бог сьвет, што Сына Свайго Адзінароднага аддаў, каб кожны, хто верыць у Яго, не загінуў, але меў жыцьцё вечнае» (Яна 3:16). Папрасеце Бога, каб Ён дапамог вам наблізіцца да Ісуса гэтым Адвэнтам праз пакланеньне – так, як тая зорка прывяла трох мудрацоў пакланіцца Яму.

Малітва: Тату, дзякую Табе, што Ты прывёў мяне да Сябе. Калі ласка, накіруй мяне бліжэй да Ісуса, чым я калі-небудзь быў – так, як Ты накіраваў гэных мудрацоў да Яго. Ісусе, я слаўлю Цябе, бо Ты мой Кароль, Бог і Збаўца! Сьвяты Духу, дапамажы мне весьці да Цябе людзей, якія яшчэ ня ведаюць Цябе, каб яны таксама наблізіліся ды пакланіліся Ісусу.

Спампуйце сёньняшнюю выяву тут.

Крыніцы: John MacArthur, Matthew 1–7, William Hendriksen, Exposition of the Gospel According to Matthew, David Platt, Exalting Jesus in Matthew, Grant R. Osborne, MatthewZondervan Exegetical Commentary Series on the New Testament).