Адвэнт: Падарожжа да РастваУзор

Здольнасьць перавышаць спадзяваньні

Габрэйскі народ стагодзьдзямі чакаў збаўцу, пра якога казалі прароцтвы — асобу каралеўскага роду, які меўся вызваліць іх ды ўсталяваць зямное валадарства. Уявіце сабе іхняе зьдзіўленьне ды недавер, калі ім сказалі, што іхні збаўца нарадзіўся ў звычайнай сям’і ў ясьлях у Бэтлееме, у найсьціплейшым месцы ў найсьціплейшым мястэчку. Тое, што габрэйскі народ убачыў, не адпавядала іхным спадзяваньням.

Але Бог не займаецца спраўджваньнем спадзяваньняў. Ён займаецца руйнаваньнем спадзяваньняў. Ісус зьяўляецца неверагодным прыкладам празьмернае дабрыні Бога. Праз Ісуса Бог задаволіў тыя патрэбы габрэйскага народу, аб існаваньні якіх яны нават і не падазравалі. Ён даў ім нашмат больш за мімалётны дабрабыт зямнога каралеўства. Ён ўсталяваў Сваё вечнае каралеўства, забясьпечыў збаўленьне, прымірыў чалавецтва з Сабой ды даў гэтаму пакалечанаму сьвету надзею.

Як часта мы ўскладаем на Бога спадзяваньні, мяркуючы, што Ён будзе дзеяць згодна з нашым плянам ды раскладам? Гэтая звычка шкодзіць нашай веры, бо Бог рэдка дзее тады, калі заўгодна нам, і Ягоныя адказы рэдка адпавядаюць таму, што мы сабе ўяляем.

Мы мусім зразумець, што ўскладаць спадзяваньні на Бога ды давяраць Ягонаму пляну з надзеяй на тое, што Ён ажыцьцявіць Яго ў нашым жыцьці — дзьве розныя рэчы. Калі мы ўскаладаем спадзяваньні на Бога, то мы будзем адчуваць расчараваньне, фрустрацыю ды абурэньне, калі яны ня спраўджваюцца. А вось здаровае спадзяваньне на Бога дапамагае нашай веры расьці.

Якія жаданьні Бог памясьціў у вашым сэрцы? Гэтым Раством, знайдзіце суцяшэньне ў тым, што Бог жадае зрабіць больш, чымся проста спраўдзіць вашыя спадзяваньні. Ён жадае перавысіць іх. Падбадзёрцеся, ведаючы, што Бог здолее зрабіць нашмат больш за тое, што мы просім. Разьлічвайце на тое, што Бог абавязкова будзе дзеяць, давярайце Ягонаму працэсу ды назірайце за тым, як павялічваецца вашая вера.

Малітва: Тату, дзякую Табе за напамін ў Ісусе аб тым, што Ты ласкава задавальняеш мае патрэбы, аб якіх я нават і ня ведаю. Гэтым Раством, дай мне ўпэўненасьці ў тым, на што я спадзяюся, але яшчэ не магу бачыць. Дапамажы маёй веры ў Тваю вернасьць павялічыцца. Дзякую Табе за тое, што Ты Бог, Які перавышае спадзяваньні. Твой расклад дзеяньня дасканалы, і Твой плян — найлепшы. Дзей у маім жыцьці так, як Табе хочацца!

Спампуйце сёньняшнюю выяву тут.