لشهر نونبر؛ رحمات جديدة كل صباحعينة

ماعمّرك تلقا الشبعة ديال القلب في التمرد. السلام الحقيقي ديال القلب ديما كاين في الخضوع للمنجّي.

اليوم عيد ميلادي. كنقول هادشي ماشي حيت كنتمنّى تصيفط ليّا شي كادو. أنا تمشّيت مع الرب ودرست الكلمة دياله بزّاف ديال السنين. مدة طويلة لدرجة ماكنبغيش نهدر عليها. مع السنين، كتاسبت مستوى عالي من المعرفة الكتابية وفهم قوي للعقيدة ديال كلمة الله. وأكيد كبرت في إيماني. عندي فهم للأمجاد ديال النعمة اللّي كتفدي اللّي ماكانتش عندي بزّاف ديال السنين كولد ديال لله. شاركت في بزّاف ديال الخدمات الروحية في بزّاف ديال البلايص. الدعوة ديال الله ليّا خداتني لكل قارة تقريبًا باش تكون عندي شراكة روحية مع شعب الله تمّا ونخدمهم. عندي مكتبة عامرة بكتوب عامرين بالنعمة. كيعجبني نسبّح الله وكيعجبني نسمع الوعظ اللّي كيركّز على المسيح وعامر بالنعمة. أنا متزوج من مراة تقية كتشجّع إيماني. هاد عيد الميلاد ديالي، بحال لخرين قبل، كيحفزّني باش نحسب البركات اللّي في حياتي، وهما بالحق كتار. ولكن كاينة حاجة وحدة كتواجهني اليوم بحال العام اللّي داز: أنا ماتخرّجتش من المدرسة ديال النعمة مازال.

أنا مازال كنميل باش نفكّر بلّي طريقي هي حسن. لّا، ماشي في الدنوب الكبيرة والعظيمة واللّي باينة، ولكن في الدنوب اللّي كنقبلوهم بحال الإفتخار، عدم الصبر، الفشل ديالي باش نكون ضريف، نحب نفسي كتر من جاري، نحب الخليقة كتر من اللّي خاصني. كنحشم باش نعتارف بلّي كل هادشي كيغدّيه وهم كبير اللّي هو أنني فكّرت بلّي نتاصرت هادي مدة طويلة. هو وهم كشفت عليه بزّاف في كتاباتي وفي كلامي. هو أعضم كدبة، الكذبة اللّي تقالت أول مرة في الجنة واللّي من داك النهار تكررات مليار مرة. نتيقو بهاد الكدبة ماشي غير كيرجّعنا حمّاق وصافي، ولكن حتّى كيخلّينا نكونو متمردين ضد الأب ديالنا السماوي. شنو هي هاد الكدبة؟ هي الكدبة اللّي كتقول بلّي الحياة تقدر تكون برّا من الخالق.

كلنا بغينا راحة دايمة وسلام قلب قوي. بغينا نكونو قادرين باش نحبسو التقلاب ويكونو عندنا قلوب راضيين. ولكن حنا كننساو بلّي السلام ديال القلب الحقيقي ماكاينش أبدًا في الجهة لخرا من الحدود ديال الخالق. ديما السلام والراحة كاينين ملّي كنعطيو قلوبنا في خضوع للمنجّي. السلام والراحة كاينين في هاد الكلمات: "وْمَمْلَكْتْكْ تْجِي، وْمُرَادْكْ يْكُونْ كِمَا فْالسّْمَا هَكَّا عْلَى الْأَرْضْ" (متى 6: 10). كنقولو لله: "بغيت مملكتك تجي في كل حاجة كنفكّر فيها، كنبغيها وكنقولها. بغيت مملكتك تجي في زواجي وفي عائلتي. بغيت مملكتك تجي في خدمتي. بغيت مملكتك تجي في الوقت الخاوي ديالي. بغيت مملكتك تحكم قلبي باش التجاوز ديال حدودك مايبقاش يكون حاجة كتجدبني". هادي هي صلاتي من أجل نفسي وكل واحد كسيمع هاد الدراسة.

من أجل دراسة وتشجيع كتر: مرقس 8: 34-38