لشهر نونبر؛ رحمات جديدة كل صباحعينة

بما أن الخطيّة عميقة كتر من غير شي سلوك خايب، فراه باش نحاولو نديرو حسن، هو ماشي حل. غير النعمة اللّي كتغيّر القلب هي اللّي تقدر تنجّينا.

كاين فرق بين شخص كتاخدو خيبة الضن لباش يحاول يجدّد نفسه وبين شخص كياخدو الحزن للاعتراف الصادق. كنضن أنّنا بزّاف ديال المرّات كنخلطو بين هاد الجوج. الشخص الأول كيأمن بالقوة الشخصية وإمكانية ينجّي نفسه، ملّي الشخص الثاني كيتخلّى على التقوى دياله وكيطلب المساعدة ديال واحد أخر. واحد فيهم كيفيق في الصباح وكيقول لنفسه بلّي هو غيكون أحسن داك النهار، ولكن لاخر كيبدا نهاره وهو كيطلب النعمة. واحد فيهم تابع تغيير في السلوك، ولاخر كيعترف بقلبه التالف. واحد فيهم بغا يأكد بلّي عنده قوة من أجل التغيير الشخصي، ملّي لاخر كيعرف أنه محتاج تعطاه القوة من أجل الحرب. واحد فيهم متمسّك بإمكانية التجديد الشخصي، ملّي لاخر تخلّا على هاد الأمل، وهاكدا كيهرب لعند الله وكيطلب المساعدة.

راه التجديد الشخصي اللّي كيعتمد على الدات والتكفير على الدونب اللّي كيتبعه هما العكس ديال الإعتراف الصادق مع التوبة اللّي كتجي موراه. النّاس اللّي كيعترفو بلّي داكشي اللّي دارو هو غلط ودغية كيصاوبو خُطَط باش يديرو حسن، هما بلا مايقصدو كينكرو شنو كيقول إنجيل يسوع المسيح عليهم، وكيفاش كيوقع التغيير الحقيقي، وفين يمكن نلقاو المساعدة. الحاجة اللّي ماشافوهاش أولا هملوها هو الاعتراف. ملّي كتعترف بدنوبك لله، فراك ماشي غير كتعترف بلّي راك دنبتي؛ لّا، راك حتّى كتعترف بلّي راه ماعندكش القدرة باش تحرّر نفسك من الخطية اللّي يالّاه عترفتي بيها. الاعتراف الحقيقي ديما كيجمع بين الاعتراف بالدنب وبين طلب المساعدة. إدن القلب اللّي شجعّو الغفران ديال يسوع والحضور دياله، مشتاق يعيش بطريقة جديدة وحسن (التوبة).

الشخص اللّي كيبيّن عتراف داتي بالدنب كيخصّص لنفسه القوة باش يدير حسن ومن بعد كيعطي لنفسه أعمال ديال كفارة عندها مضهر روحي كتخلّيه يحس راضي على نفسه وقدرته المحتملة باش يدير حسن. ولكن وهو كيعترف بالدنوب، ماكاينش بُعْد إلهي عمودي لداكشي اللّي كيدير. بغيت نقول بلّي ماكاينش عتراف مع الله، ماكاينش اعتراف بحتياجه العميق للإنقاد، وماكيناش توبة من خلال قلب عامر بالشكر والعبادة لله. هي طريقة تعامل مع الدنوب ديال "نقدر ننجّي نفسي"، وهي منتشرة في كنيسة يسوع المسيح كتر من اللّي كنفكّرو. ماعمّر كتنتج تغيير دائم. ماعمّر كتنتج تواضع قلبي وقائي وكيحمي. ماعمّر كتحفّز عبادة كتر وخدمة روحية للمنجّي. بكل بساطة هي ماخدّاماش. إلا كانت عندك القدرة باش تغيّر نفسك بلا المساعدة ديال الله، كون ماكانش خاص يسوع يجي. القصة الكاملة ديال الإنجيل في الكتاب المقدس هي قصة ناس حاصلين بقوة في الدنوب وماعندهم أي رجاء من غير نعمة الفادي اللّي كتنجّي. ملّي تبان خطيّتك اليوم، شمن طريق من هاد الجوج طرقان غتاخد؟

من أجل دراسة وتشجيع كتر: لوقا 15: 1-10