لشهر نونبر؛ رحمات جديدة كل صباحعينة

كيفاش مايكونش عندك كل ما تحتاج والمنجّي ديالك واعدك باش مايمنع عليك حتّى حاجة مزيانة؟

الإحتياج - هي كلمة متيرة للإهتمام. هي وحدة من الكلمات اللّي كتستعمل بزّاف في التقافة البشرية ووحدة من الكلمات اللّي كتستعمل بشكل غلط بزّاف. كنستعملوها باش نشيرو لفئة كبيرة ومازال كتكبر واللّي فيها كل الحوايج اللّي ولّينا مقتنعين بلّي حنا مانقدروش نعيشو بلا بيهم. الأغلبية منّا كنضنو بلّي حنا محتاجين بشي طريقة، وأغلبيتنا كنخافو بلّي الإحتياج ديالنا ماغيتسدش. وكلنا كندوزو من دوك الأوقات ملّي كنتسائلو على واش الله بالحق كيعرف شنو حنا محتاجين وملتزم بالحق باش يوفّره لينا. كنتغراو باش نطلّو مورا السور على حياة الناس لخرين ونشوفو بلّي حتياجاتهم تسدّو، وهادشي كيخلّينا نتساؤلو علاش حتياجاتنا ماتسدّوش. أه، الإحتياج هي كلمة متيرة للإهتمام وللقلق.

المشكلة كاينة في أنه إلا كان الإحتياج كيعني "ضرورة للحياة"، فراه الأغلبية ديال الحوايج اللّي كنحطو في القائمة ديال الإحتياج في الحقيقة هما ماشي حتياجات. في الحقيقة هما رغبات ولاو عزاز ومهمّين بزّاف لينا لدرجة أننا وصلنا للحد مانقدروش نتخيلو نكونو سعداء بلا بيهم. في هاد المرحلة، كيشدّو أفكارنا، كيوجهو رغباتنا، وكيشكلو الطريقة اللّي بيها كنفكّرو في حياتنا، وفي الأخير كيحددو كيفاش كنفكّرو في الله.

هاهما تلاتة ديال الحوايج كيوقعو ملّي كتقول على شي حاجة أنها حتياج:

1.إلا كنتي مقتنع بلّي شي حاجة هي حتياج، فراك كتحس أنك كتستحقّها وخاصّك تاخدها. هادشي كيعني أنك متأكد بلّي راه من حقك تكون عندك في حياتك.

2.إلا كنتي مقتنع بلّي شي حاجة هي حتياج، فراك كتفكّر بلّي من حقك تطلبها. ماكتكونش مرتاح باش تطلبها مرارًا وتكرارًا.

3.إلا كنتي مقتنع بلّي شي حاجة هي حتياج، فراك كتحكم على محبة الله من خلال واش هو مستعد يعطيها ليك.

هادا هو الإتجاه المخيف اللّي كياخدك ليه المفهوم ديال "الإحتياج". إلا كنتي مقتنع بلّي شي حاجة هي حتياج والله ماعطاهاش ليك، كتبدا تشك في الصلاح دياله. الخطر المميت اللّي كاين في أنك تشك في صلاح الله هو أنك ماغتحاولش تمشي تطلب المساعدة من الشخص اللّي كتشك فيه. الحوايج اللّي بالغلط كنسمّيوهم "حتياجات" يقدرو يهدمو علاقتك مع الله. أنا أكيد بلّي بزّاف من الناس كيعانيو من الشك في صلاح الله وأمانته بسباب هادشي بالضبط. ماكيقدروش يصدقو بلّي الله يقدر يفشل يعطيهم الحاجة اللّي كيبان ليهم أنهم مايقدروش يعيشو بلا بيها. الله ماواعدكش باش يعطيك شنو بغيتي، ولكن هو ملتزم باش يسد كل حتياجاتك. هادشي علاش مُريح ومشجّع تعرف بلّي عندك أب سماوي كيعرف بالضبط شنو كتحتاج وخدّام كيعطيك حسب هاد الإحتياج.

من أجل دراسة وتشجيع كتر: مزمور 84: 11 ومتّى 6: 25-32