لشهر شتنبر؛ رحمات جديدة كل صباحعينة

الرعاية أولا الاهتمام ديال الله كيجيو في أشكال كتيرة. في الصبر دياله، الله عنده اهتمام كافي باش يعطي الوقت الكافي باش نعمته تدير خدمتها التغييرية.

فوقاش كانت أخر مرة تأملتي فيها في الصبر الرائع ديال الأب ديالك السماوي؟ فوقاش كانت أخر مرة شكرتيه فيها حيت هو مستعد يتسنّا؟ واش كتعرف بلّي راه بلا قلب الله اللّي صبور بشكل لايصدّق، ماعمّر يكون عندك أي رجاء؟ راه الصبر ديال الله هو اللّي كيعطي الوقت لنعمته باش تدير خدمتها.

ملّي كنقرا العهد القديم، كيفاجئني الصبر ديال الله. غالبًا ما فكّرت بلّي إلا كنت أنا كنتحكّم في كلشي، بسباب عدم الصبر ديالي الكبير، كون أدم وحواء كانو طاحو في الصباح بكري، ويسوع جا مور الغدا ومن بعد مات وقام عوتاني في ديك العشية. ولكن الطرق ديال الله هما ماشي بحال الطرق ديالي. عام مورا عام، عقد مورا عقد، قرن بعد قرن حتى حرفياً دازت آلاف السنين قبل ما جا يسوع باش يتعامل مع الكارتة ديال السقوط. وواخّا هكداك، كيقول الكتاب المقدس بلّي يسوع جا في الوقت المناسب (رومية 5: 6). هادشي كيعني بلّي كل دوك النسين، الله كان كيوجّد العالم للمجية ديال المنجي.

حتّى فاجئني الصبر ديال الله مع إسرائيل. كيلمسنا هادشي ملّي كنقراو كتب الأنبياء. راه الله ماشي غير كيصيفط نبي واحد باش يعطي تحدير واحد. لا، في عرض واعر ديال الصبر الإلهي، كيصيفط نبي مورا نبي، وهو كيعطي ولاده فرصة مورا فرصة باش يستاجبو للرحمة دياله.

أنا حتّى كيلمسني الصبر ديال يسوع مع تلامده. ماكيبانش أنهم فهمو الأمور مزيان وبشكل كامل. حتّى ملّي كان طالع للسما، كانو كيسوّلو الأسئلة الغالطة. ولكن يسوع ماتخلّاش عليهم. ماگالش ليهم بلّي صافي هو مايقدرش يزيد معاهم وبلّي غيمشي يقلّب على تلامد جداد. هو كيعطي الوقت لنعمته باش تغيّر هاد المجموعة ديال الرجال المتكبرين والتالفين.

كيفاش مانكونوش أنا ونت شاكرين على الصبر ديال الله معانا؟ هو ماكيطلبش منّا نضج تم نّيت. هو ماكيطلبش منّا نفهمو الأمور بزّربة. هو ماكيعلّمناش شي درس مرة وحدة وصافي. كيجي لعندنا في موقف مورا موقف، كل موقف هو متحكّم فيه بنعمته السامية، كل موقف مصمّم باش يكون أداة ديال التغيير، وكيخدم على نفس الأمور مرارًا وتكرارًا. أنا ماكيعجبنيش نبقا نعاود الهدرة. أنا كنميل نبغي باش يفهموني الناس بزّربة. أنا حزين حيت قلبي مازال ماشي بحال القلب ديال المنجّي ديالي.

هادشي علاش مايمكنش نفصل الرعاية أولا الاهتمام ديال الله على الصبر دياله. راه الاستعداد الحنين دياله باش يتسنّا هو اللّي كيخلّي النعمة دياله القوية تكمّل الخدمة ديالها ديال التغيير. شكر الله اليوم على هاد الصبر. هو الرجاء ديالك. ونت كتشكره، صلّي باش يخلّيك تكون كتر كتشبه ليه- مستعد تعطي الوقت للرحمة دياله باش تدير خدمتها.

من أجل دراسة وتشجيع كتر: بطرس التانية 3: 8-9