لشهر شتنبر؛ رحمات جديدة كل صباحعينة

النعمة كتخلّينا نحياو من أجل الله وكتخلّي عينينا يكونو مفتوحين على الحقائق الروحية اللّي قبل ماكانتش عندنا القدرة باش نشوفوهم.

وَاخَّا هَكَّاكْ، رَاهْ كَنْتّْكَلّْمُو بْالْحْكْمَة بِينْ الْمُومْنِينْ اللِّي نَاضْجِينْ، مَاشِي بْحْكْمَةْ هَادْ الدّْنْيَا وْلَا بْحْكْمَةْ الرُّؤَسَا دْيَالْهَا اللِّي مَا دَايْمِينْشْ.وَلَكِنْ كَنْتّْكَلّْمُو بْحْكْمَةْ اللَّهْ اللِّي فْالسِّرْ. هَادِيكْ الْحْكْمَة اللِّي كَانْتْ مْخَبّْيَة، وْاللِّي وَجّْدْهَا لِينَا اللَّهْ مْنْ قْبَلْ مَا تّْخْلَقْ الدّْنْيَا عْلَى وْدّْ الْعَزّْ دْيَالْنَا،وْاللِّي مَا عْرَفْهَا حْتَّى وَاحْدْ مْنْ الرُّؤَسَا دْيَالْ هَادْ الدّْنْيَا، حِيتْ كُونْ عَرْفُوهَا، كُونْ مَا صْلْبُوشْ رَبّْ الْعَزّْ.وَلَكِنْ كِيفْ مْكْتُوبْ فْكْتَابْ اللَّهْ:

«اللِّي مَا شَافْتُه عِينْ، وْمَا سْمْعَاتُه وْدَنْ، وْمَا جَا عْلَى بَالْ حْتَّى شِي إِنْسَانْ، هُوَ اللِّي وَجّْدُه اللَّهْ لْهَادُوكْ اللِّي كَيْبْغِيوْهْ».

وْبَيّْنُه لِينَا اللَّهْ بْرُوحُه،حِيتْ رُوحْ اللَّهْ كَيْفْحَصْ كُلّْشِي حْتَّى أَعْمَاقْ اللَّهْ.وْشْكُونْ اللِّي كَيْعْرَفْ آشْ كَايْنْ فْأَفْكَارْ بْنَادْمْ مْنْ غِيرْ الرُّوحْ اللِّي فِيهْ؟هَكَّاكْ حْتَّى أُمُورْ اللَّهْ مَا كَيْعْرَفْهَا حَدّْ مْنْ غِيرْ رُوحْ اللَّهْ.وْرَاهْ حْنَا مَا خْدِينَاشْ الرُّوحْ دْيَالْ الدّْنْيَا، وَلَكِنْ خْدِينَا الرُّوحْ اللِّي مْنْ عَنْدْ اللَّهْ، بَاشْ نْعَرْفُو الْأُمُورْ اللِّي وْهَبْهَا لِينَا اللَّهْ،وْبْهَادْ الْأُمُورْ كَنْتّْكَلّْمُو، مَاشِي بْكْلَامْ كَتْعَلّْمُه الْحْكْمَة دْ بْنَادْمْ، وَلَكِنْ بْكْلَامْ كَيْعَلّْمُه الرُّوحْ الْقُدُسْ، وْكَنْشَرْحُو الْأُمُورْ الرُّوحِيَّة لْلنَّاسْ اللِّي عَنْدْهُمْ هَادْ الرُّوحْ.

وَلَكِنْ النَّاسْ دْيَالْ الدّْنْيَا مَا كَيْقَبْلُوشْ دَاكْشِّي اللِّي مْنْ رُوحْ اللَّهْ حِيتْ كَيْحَسْبُوهْ حْمَاقْ، وْمَا يْقَدْرُوشْ يْفَهْمُوهْ عْلَاحْقَّاشْ مَا يْقَدْرُوشْ يْحَكْمُو فِيهْ مْنْ غِيرْ بْالرُّوحْ.وَلَكِنْ بْنَادْمْ اللِّي فِيهْ الرُّوحْ الْقُدُسْ كَيْحْكَمْ فْكُلّْشِي، وْهُوَ مَا كَيْحْكَمْ فِيهْ حَدّْ.وْكْتَابْ اللَّهْ كَيْݣُولْ: «شْكُونْ اللِّي عْرَفْ أَفْكَارْ الرَّبّْ؟ وْشْكُونْ غَيْقْدَرْ يْنَصْحُه؟».أَمَّا حْنَا رَاهْ عَنْدْنَا أَفْكَارْ الْمَسِيحْ. (كورنتوس اللّولة 2: 6-16)

هادا واحد من المقاطع الكتابية اللّي كيقول كلشي. هو كيواجهنا بعدم القدرة ديالنا باش نشوفو ونفهمو الأمور ديال الله، وهي أمور مهمة ماشي غير باش نعرفو الله، ولكن حتّى نعيشو الحياة كيما هو صمّمها باش نعيشوها. أنا ونت بكل بساطة مانقدروش نعرفو كل ما كنحتاجو نعرفو باش نكونو شنو خاصنا نكونو ونديرو شنو خاصنا نديرو من خلال الخبرة الشخصية والبحت الجماعي. كاين بزّاف ديال الحكمة كتجي لعندنا غير من خلال الوحي. الله كيكشف لينا على هاد الحكمة أولاً في كتابه الفدائي العظيم، الكتاب المقدس، ومن بعد كيفتح عينينا وقلوبنا باش نقدرو نقبلو ونفهمو داكشي اللّي هو كيكشف عليه. بلا هاد الخدمة ديال النعمة اللّي كتنوّر، هاد الأمور غتكون في أسوأ الأحوال مخبعة كليّا علينا وفي أحسن الأحوال غتكون حماقة كبيرة بالنسبة لينا. كنحتاجو باش يجي المسيح لعندنا بروحه باش يكشف لينا عقليته باش نقدرو نفكرو بحاله.

كل هادشي هو مهم بزّاف حيت واحد من الحوايج اللّي كتديرهم الخطية هو أنها كترجّعنا كلنا حمّاق. الخطية كتجيب معاها الحماق، اللّي كلنا كنحتاجو النجاة منّه. إدن هنا كاينة النعمة المُحرِّرة اللّي كتفتح العينين والفهم ديال قلوبنا باش نعرفو الله ونعرفو نعمته ونقلبو على الحياة اللّي غير الله يقدر يعيطها ونقبلوها.

من أجل دراسة وتشجيع كتر: يوحنا 14: 15-31