لشهر غشت؛ رحمات جديدة كل صباحعينة

راك نت ماشي مدعو باش تخدم من أجل القبول ديال الله؛ نت مدعو باش تتيق في هاداك اللّي كمّل هاد الخدمة في بلاصتك.

كنزيدو نحاولو نديروها، واخّا تقال لينا مرارًا وتكرارًا بلّي مستحيل. كتخلّينا يا إما نكون بطريقة وهمية مفتاخرين أولا بطريقة غير منطقية خايفين. كتخلّينا نتخبعو في الإحساس بالدنب والعار، خايفين من الشخص الوحيد اللّي يقدر يعاونّا. بالخوف، كنخدمو من أجل داكشّي اللّي ديجا خديناه. في ضعف الرجاء، كنقلبو على داكشي اللّي ديجا عندنا. في الوهم ديال الفداء، شي بعضين منّا كنفتاخرو بداكشي اللّي كسبناه أولا ماحقّقناهش بنفوسنا. في سوء الفهم ديالنا، كنحسدو الناس على داكشي اللّي كنضنّو عندهم وكنتمنّاو نقدرو نحقّقو داكشي اللّي هما حقّقوه. حنّا كندوّزو حياتنا وحنا كنحسّو ماشي غير بجال ماحقّقنا والو، ولكن بلّي ماعمّرنا غنحققو شي حاجة. كنتسائلو على شنو بالحق كيفكّر الله علينا، والفكرة ديال حضوره كتنتج في قلوبنا خوف كتر من الراحة. كل هادشي في لقلب ديال رسالة الإنجيل.

راه يسوع عاش الحياة المتالية اللّي أنا ونت ماعمّرنا قدرنا وماعمّرنا نقدرو نعيشوها، ودابا التقوى دياله تزادت في حسابنا. مات الموتة اللّي كان خاصنا نموتوها. موته طفا الغضب ديال الآب على دنوبنا. ناض من الموت عوتاني، منتصر على الخطية والموت باش حتّى حنا نعرفو الحياة الأبدية. كل هادشي تدار باش يهدم الفجوة اللّي بينا وبين الله، باش نكونو مقبولين بشكل كامل وأبدي في عائلته، وماعمّرنا نواجهو الرفض دياله عوتاني، وماعمّرنا نخلصو الجزاء ديال دنوبنا عوتاني، ونتحررو من يكون خاصنا نوصلو للمعيار دياله باش نربحو محبته. داكشي اللّي خاص يتدار، داره يسوع. الخدمة كملات.

دابا، ملّي قلنا هادشي، راه صحيح أنك مدعو باش تخدم. راك مدعو باش تسلّم نفسك للخدمة ديال مملكة الله وباش تطيع الوصايا ديال الملك يوميًا. راك مدعو باش تعتارف بلّي حياتك مابقاتش ديالك حيت تشريتي بتمن. ولكن الخدمة اللّي كتديرها ماكتدارش باش تربح شي حاجة. الخدمة اللّي مطلوب منّك تديرها، خاص تديرها في الفرح بواحد الحاجة. راك ماكتخدمش باش تربح الفضل ديال الله. ولكن راه خدمتك هي ترنيمة شكر على النعمة اللّي وصل ليها المسيح في بلاصتك. ماخاصّكش تتساءل على واش درتي أعمال كافيين. ماخاصّكش تخاف من أنك غتفشل وغتّطرد من العائلة. ماخاصّكش تخاف من أن الله غيعطيك بضهره. ماخاصّكش تخمّم في السؤال على واش نت درتي كافي في مدة كافية. المسيح داز على القنطرة المستحيلة. المهمة كملات. علاقتك مع الله أمنة للأبد. دابا، بالشُّكر، سير ودير خدمته.

من أجل دراسة وتشجيع كتر: لوقا 1: 67-79