لشهر غشت؛ رحمات جديدة كل صباحعينة

العبادة الجماعية الهدف منها هو تبهرك بالنعمة ديال الله باش تبغي تكون أداة لديك النعمة في حياة الناس لخرين.

الحياة في عالم ساقط هي صعيبة. الخدمة الروحية من أجل الناس الساقطين صعيبة. هادو جوج حاجات كيخلّيوك عيّان ومحبط وكيخلّيوك تحماق شوية. بكل بساطة ماتقدرش تعيش مع الخطاة ومايخطئوش ضدّك. ماتقدرش تعيش مع الناس بلا ماتشوف قلوبهم الحقيقية.

كنفهم علاش الناس بعدما كيتجرحو وكيخيب ضنهم اللّي غالبًا ماكيفسد علاقاتنا، كيقررو يعيشو معزولين أولا في شي علاقات عابرة مريحة ماكتساليش. كنفهم علاش كيقولو الناس لنفوسهم، "ديجا دارت بيّا وماغتدارش بيّا عوتاني". كنفهم علاش الأزواج كيختارو يعيشو في علاقات حرب باردة طويلة كتفتقر للصداقة القريبة والوحدة. كنفهم علاش الناس ديال الخدمة الروحية كيختارو يعيشو في عزلة على جسد المسيح. كنفهم علاش الدراري كيختارو يعيشو بعيد على والديهم. كنفهم علاش بزّاف د الناس كيخافو من التجمعات العائلية الكبيرة في الأعياد. كنفهم علاش الناس كيخبعو الجروح ديالهم وكيرفضو يتكلمو مع بعضياتهم على المواضيع اللّي كتألّم. كنفهم علاش الناس ماكيبغيوش يطلبو المساعدة أولا يقدمو المساعدة ملّي شي واحد كيطلب منهم. كنفهم بلّي حتّى واحد فينا ماسبق ليه عاش في علاقة وحدة ماخيباتش الضن دياله بشي طريقة. كنفهم بلّي العلاقات صعاب.

ولكن كاينة حاجة خرا كنفهمها. هو أن العلاقات، بالنسبة للمؤمن، ماشي شي أسلوب حياة ختياري. لّا، هي جزء أساسي من دعوة الله بين النجاة ديالك وقيامتك الأخيرة. الإيمان الكتابي هو في الأساس علاقات. هو كيتشكّل ومدفوع من خلال جوج إتحادات أساسيّين. أولاً وقبل كلشي، الإتحاد مع الله اللّي هو السبب الكامل للوجود ديالنا. الحياة كاينة في الإتحاد مع الخالق. ومن بعد كاينة دعوة الله باش ماشي غير تعيش في محبة مضحية بالنفس تجاه الناس اللّي قراب ليك، ولكن حتّى باش تكون أداة ديال الخِدمة ديال الله في القلب والحياة ديال الناس اللّي قراب ليك. أنا ونت ماعندناش الإختيار ديال الانسحاب. حنا كائنات علاقاتية دعانا الله مدى الحياة مع الله والنّاس لخرين مدى الحياة.

حنا محتاجين للمساعدة باش نواجهو الدعوة للعلاقات اللّي كتغمرنا غالبّا، وحنا كنتبعو معايير الله العالية وماكنستسلموش للرغبة باش نهربو. جزء من هدف الله في العبادة الجماعية هو باش يصحّح رؤيتك لديك العلاقات. إلا كنتي ماكتشوفش في علاقاتك من خلال النضاضر ديال نعمة الله الرائعة، فراك ماكتشوفش العلاقات بدقة. إدن الهدف من إجتماع مورا إجتماع هو باش يأسرك بالعظمة ديال نعمة الله باش ماتقدرش تفكّر في أي حاجة حسن من تكون أداة لديك النعمة في حياة الناس لخرين.

من أجل دراسة وتشجيع كتر: رومية 13: 8-14