لشهر يونيو؛ رحمات جديدة كل صباحعينة

حتى قدر من الإحساس بالدنب أولا العار مايقدر يدير داكشي اللّي تقدر تديره النعمة- كيخلّينا نكونو ناس كيفرحو بالمشيئة ديال الأب.

ماعمرك غتفهم الصراع ديالك مع الخطية من غير إلا فهمتي بلّي راه الخطية في الجوهر ديالها هي مشكلة ديال القلب. فاللّول هي ماشي مشكلة ديال سلوك خايب، واخا هادا هو اتجاهها. فاللّول هي ماشي مشكلة ديال إغراء خارجي، واخا هي كتخلّينا نستسلمو للجادبية ديال الإغراء. فاللّول هي ماشي مشكلة ديال بلاصة أولا موقف، واخا هي كتبّين على راسها تمّاك. الخطية هي مسألة قلب. خلّيني نشرح شنو يعني هادشي.

الكتاب المقدس كيستعمل بزّاف ديال المصطلحات من أجل نفسك الداخلية، الروحية، الفكرية، نفسك اللّي كترغب، واللّي كتحفّز، ولكن كل هاد المصطلحات هي مجموعة وملخصة في مصطلح مجموع واحد كبير: القلب. هو واحد من المصطلحات اللّي تستعملو بزّاف في الكتاب المقدس. في الحقيقة، أنا مقتنع بلّي راك ماتقدرش تفهم الرسالة التغييرية ديال الكتاب المقدس من غير إلا فهمتي هاد المصطلح. هاهو واحد التعريف خاصك تخلّيه معاك ملّي كتقرا الكتاب المقدس: القلب هو السبب الجوهري ديال شخصيتك. هو مركز أفكارك وعواطفك ورغباتك ودوافعك. هو مركز العبادة ديال نفسك. القلب هو السبب علاش كتدير داكشي اللّي كتدير، وكتقول داكشي اللّي كتقول. أنا ونت كنعيشو حرفيا بقلوبنا.

الخطية كتعيش في قلوبنا، وعلى هادشي هي كتفسد أفكارنا ورغباتنا واختياراتنا ودوافعنا. راه تخلقنا باش نكونو خدّام ديال الله، ولكن الخطية خلاتنا نحبّو نفوسنا. راه تخلقنا باش نعبدو الخالق، ولكن الخطية خلّاتنا نعبدو الخليقة. راه تخلقنا باش نعيشو من أجل مجد الله، ولكن الخطية كتخلّينا نردّو الحياة كتدور على المجد ديالنا. وإلا ماتغيْروش هاد الحوايج في قلوبنا، فراه سلوكنا ماعمرّه يتغيّر، أو في حالة تغيّر سلوكنا، فراه ماغيتغيّرش لمدة طويلة. حتى قدر من الإلتزام بالتجديد الذاتي ماغيغيّر قلبك. حتى قدر من المحاولات باش تغيّر العادات الخايبة اللّي فيك ماغيغيّر قلبك. حتى قدر من الإحساس بالدنب والعار ماغيغيّر قلبك. راه الهروب من المواقف والبلايص والعلاقات ماعندوش القوة باش يغيّر قلبك. ماتقدرش تهرب من الخطية حيت ماتقدرش تهرب من نفسك. أكبر أعمال التكفير على الدنوب في العالم هي عاجزة باش تدير داكشي اللّي خاصه يتدار – تغيير جدري لقلبك.

هادشي علاش راه بقا غير خيار واحد أخير. هو الخيار الوحيد المنطقي؛ كل شي لاخر هو غير حماق. وكنحتاجو نديرو هادشي مرارًا وتكرارًا حتى مانبقاوش محتاجين نديروه مازال. كنحتاجو نجرّيو لعند نعمة يسوع. نجرّيو لعنده من أجل الغفران. نجرّيو لعنده من أجل القوة. نجرّيو لعنده من أجل التغيير. نجرّيو لعنده من أجل التحرير. نجرّيو! نجرّيو! نجرّيو! ماعمرك توقف تجرّي لعند النعمة حتّى ياخذك يسوع للدار، للبلاصة فين ماغتحتاجش تجّري مازال.

من أجل دراسة وتشجيع كتر: مرقس 7: 1 – 23