لشهر فبراير؛ رحمات جديدة كل صباحعينة

تولدتي في عالم ديال السلطة، ونت ماشي هو ديك السلطة. العصيان كينزّل الله من العرش ديال قلبك وكيگلسك في بلاصته.

تقدر تقول بلّي أهم الكلمات في الكتاب المقدس كلّه هي التلاتة ديال الكلمات اللّولين، "في البدية، الله... " الهدف من هاد الكلمات هو يغيّرو كيفاش نت كتفكر في نفسك، والحياة، والله، وكل حاجة خرا. الله كان هنا قبل ماتكون نت. الأرض وكل ما فيها هما كيعبرو على المخطط والقصد دياله. وحيت هو الخالق ديال كلشي، فكلشي هو ملكه. الله خلقك. هادشي كيعني بلّي نت دياله. أنا ونت تصممنا بعناية من أجل القصد دياله. حنا ماخلقناش نفوسنا. حنا ماخرجناش من الرواسب البدائية، كنتيجة ديال شي قوة غير شخصية. حنا نتيجة مباشرة ديال قدرة وإرادة الله المبدعة اللّي كتخلق.

دابا، فكر في هادشي. ملّي كنصنع شي حاجة، فهي كتكون بالخصوص ديالي حيت أنا اللّي صنعتها. كيقول الكتاب المقدس: "الأرض هي ديال الرب الأرض وحتى كل مافيها، العالم والساكنين فيها" (مزمور 24: 1) هادشي كيعني بلّي راه ماكايناش شي حاجة سميتها استقلالية الإنسان. أنني ننكر هادشي يعني أنني كنقول لنفسي بلّي حياتي هي ديالي باش نستعملها لقصد سعادتي. هادشي ماكيدورش غير على نكران وجود الله وسلطانه، ولكن حتى كيتعلق بنكران طبيعتي البشرية. كل البشر تخلقو باش يعيشو بفكر واعي بالله اللّي كيشكل الحياة وخضوع طوعي لسلطة الله.

هادشي كيعني بلّي راه أنا ونت ماعمّرنا نكونو في مركز الحياة، فين الله موجود. ماعمّر يكون كلشي متعلّق بينا، حيت كل شي متعلّق بيه. الحوايج ماعمرهم يتعلقو بإرادتنا أولا طرقنا، حيت كيتعلقو بإرادته وطرقه. ماعمرنا نكونو السلطة المطلقة في حياتنا، حيت هو ديك السلطة. أنك تنكر هادشي يعني نت كتنكر الواقع وكتسلّم نفسك لأخطر الأوهام. تنكر هادشي هو بحال تنكر وجود الشمس. إلا درتي هادشي، فالناس اللّي قراب ليك غيضنو أنك حمق. حتى الخطية كتخلينا نكونو حمقين بحال هاكدا. حنا كنكرو الأدلة اللّي كاينة في كل بلاصة على وجود الله والسلطان دياله. كنقولو لنفوسنا بلّي حنا هما السلطة الوحيدة اللّي كنحتاجوها. كنكتبو القواعد الأخلاقية الخاصة بينا. كنقولو لنفوسنا بلّي حنا كنعرفو شنو اللّي مزيان لينا. بخاطرنا كنقطعو حدود الله الحكيمة اللّي كتحمينا. كنجريو مورا داكشي اللّي الله كيقول هو غلط وكنهرسو داكشي اللّي الله كيعلن بلّي هو مزيان. كنّكروه كملك وكنديرو نفوسنا ملوك في عالمنا الصغير. كننساو المجد دياله وكنعيشو من أجل المجد ديال ملداتنا، القوة، الراحة، والسهولة.

هادشي علاش النعمة هي أساسية. خاص نعمة قوية كتنجّي باش تغيّرني من مدمن على الحكم الذاتي لشخص كيخضع بخاطرو وبفرح لخطة وهدف شخص أخر. خاص رحمة قوية باش نولّي شخص كيتنازل على السلطة اللّي عطاها لنفسه من أجل سلطة الله. خاص نعمة باش أنا نعترف بوجود ملك واللّي هو ماشي أنا. خاص يد الله اللّي كتنجّي باش نتخلّى على الرغبات ديال مملكتي ونتبع القصد ديال الله. يسوع خضع نفسه لمشيئة الآب حتى للموت باش أنا ونت ناخدو النعمة اللّي كنحتاجوها باش نديرو بحاله.

من أجل دراسة وتشجيع كتر: مزمور 19