Leesplan inligting
Moederskap Vol Genade - 43 Dae van Bemoediging vir Ma'sVoorbeeld
![Moederskap Vol Genade - 43 Dae van Bemoediging vir Ma's](/_next/image?url=https%3A%2F%2Fimageproxy.youversionapi.com%2Fhttps%3A%2F%2Fs3.amazonaws.com%2Fyvplans%2F47465%2F1280x720.jpg&w=3840&q=75)
Liefdevolle Vrygewigheid
Lees: 2 Korintiërs 9:1-15
SOAP: 2 Korintiërs 9:11-12
"Hy maak julle altyd in alles ryk genoeg om by elke geleentheid vrygewig te kan wees. Deur ons bemiddeling het julle vrygewigheid tot gevolg dat God gedank word, want die bediening van hierdie hulpbetoon voorsien nie alleen in die behoeftes van die gelowiges in Judea nie, maar bring ook oorvloedige dankbaarheid teenoor God mee."
Oordenking
Liewe vriendin, ons dien 'n vrygewige God. Wanneer ons gee, of dit nou ons tyd, hulpbronne of liefde is, weerspieël ons sy vriendelikheid, genade en voorsiening vir 'n wêreld wat ons dophou. Dit is God se wil vir ons lewens om vrygewigheid te toon sodat diegene wat ontvang en diegene wat waarneem beter kan verstaan wie God is en hoe Hy is. Ons moet doelbewus wees in ons vrygewigheid sodat ons kinders God se begeerte agter ons vrygewigheid en sy vrygewige hart beter verstaan.
Ons weet dat alles wat ons het 'n gawe van God is. Dit is per slot van rekening syne. As sodanig is ons rentmeesters van sy goeie gawes. Wanneer ons vreugdevol en onbaatsugtig gee, leer ons hulle op 'n tasbare, kragtige manier van God se liefde. Dit gaan daaroor om die behoeftes en begeertes van ander raak te sien en te kies om op te tree, om te seën, om te troos – nie uit verpligting nie, maar uit die oorvloed van die liefde wat God in ons harte uitgestort het.
Elke goeie gawe is van God (Jakobus 1:17). In sy hart is God 'n gewer wat dit geniet om aan sy kinders te gee en hulle te seën. Soos ons van God ontvang, gee ons aan ander. Hierdie siklus van gee gaan voort, versprei vreugde, voorsien in behoeftes en bring eer aan God. Elke daad van vrygewigheid is soos 'n saadjie wat geplant is, wat kan groei tot 'n pragtige boom van danksegging en seën in iemand se lewe.
Liewe vriendin, kom ons kies dus om vrygewig te wees. Kom ons wees die hande en voete van Jesus in 'n wêreld wat desperaat is vir sy aanraking. Kom ons wys vir ons kinders wat dit beteken om God se liefde op praktiese, alledaagse maniere uit te leef en leer hulle hoe ons nooit meer kan gee as wat God gee nie.
Gebed
Liewe Jesus, dankie vir u ongelooflike vrygewigheid teenoor my. Help my om alle dinge liggies in my hande te hou, gereed om met ander te deel. Mag my lewe u vrygewige hart weerspieël en diegene rondom my, veral my kinders, die vreugde en seën van gee leer. Amen.
Vraag
Op watter maniere kan jy God se liefdevolle vrygewigheid in jou daaglikse lewe wys, en hoe kan dit diegene rondom jou, veral jou gesin raak?
Skrif
Aangaande hierdie leesplan
![Moederskap Vol Genade - 43 Dae van Bemoediging vir Ma's](/_next/image?url=https%3A%2F%2Fimageproxy.youversionapi.com%2Fhttps%3A%2F%2Fs3.amazonaws.com%2Fyvplans%2F47465%2F1280x720.jpg&w=3840&q=75)
Hierdie Bybelstudie moedig jou aan om deur die lief en leed van moederskap op Jesus staat te maak. Leer hoe om ‘n hart van genade, oorgawe en liefde te kweek terwyl jy ‘n evangelie-gesentreerde huis bou waar kinders in d...
More
Ons wil graag Love God Greatly Afrikaans bedank vir die verskaffing van hierdie leesplan. Vir meer inligting, besoek asseblief: https://www.lovegodgreatly.com/Afrikaans