21 Dae Vas en GebedVoorbeeld

Wat is vas? Om te vas is nie nét om jouself van kos te weerhou nie. ’n Bybelse definisie sal wees: Vas is die vrywillige onthouding van kos vir ’n spesifiek tyd met die doel om jou te verdiep in jou verhouding met die Here.

Matteus 6:16-17 en 9:14-15 meld ’n baie belangrike aanname deur Jesus. Jesus sê eers "Wanneer julle vas" (6:16a) en dan "wanneer jy vas" (6:17a). Hy volg dit op met die uitdruklike stelling "Dán sal hulle vas" (9:15b). Hy neem aan dat Sy dissipels sal vas. Daar word deur die hele Nuwe Testament heen veronderstel dat Jesus se dissipels – en dit sluit ons vandag in – sal vas.

Verbind jou daartoe om vir een-en-twintig dae lank op ’n bepaalde manier te vas. Onthou, die doel van vas is nie om jouself van iets te weerhou en jou jammer te kry nie. Dit is juis dat ons vir ’n sekere tydperk iets in ons lewe prysgee om in ruil daarvoor meer van God te kan kry en beleef.

Daar is verskillende soorte vas in die Bybel. Hier is ’n kort lys van die mees algemene tipes vas:

• Volledige vas: drink vloeistowwe maar weerhou jou van enige kos
• Selektiewe vas (Daniëlvas): weerhou jou van sekere kossoorte
• Gedeeltelike vas: weerhou jou van ’n hele maaltyd – eet bv. ontbyt en middagete maar nie aandete nie
• Sielsvas: weerhou jou vir die vasperiode van iets (buiten kos) wat ’n groot invloed op jou uitoefen of baie van jou tyd in beslag neem, soos bv. sosiale media en die kyk van TV.

"Prayer is reaching out after the unseen; fasting is letting go of all that is seen and temporal." – Andrew Murray