Nie Goed NieVoorbeeld

In antieke Griekeland was daar 'n legende oor 'n man, genaamd Sisyphus. Hy was 'n slinkse prins wat 'n paar van die Griekse gode verkul het — wat nooit 'n goeie idee is nie. As straf het hulle hom geforseer om 'n groot rots teen 'n heuwel op te stoot, wat elke keer onmiddellik weer teen die heuwel teruggerol het. Volgens hierdie mite was sy straf om tot in ewigheid daardie rots herhaaldelik teen die heuwel op te stoot. Dit klink nie soos 'n goeie manier om die ewigheid deur te bring nie.

Sommige goed in jou eie lewe laat jou dalk net soos Sisyphus se lot voel. Miskien het jy 'n siek familielid wat net nie gesond word nie. Miskien kan jy net nie 'n manier vind om jou punte op skool te verbeter nie. Dalk het jou familie eindelose finansiële probleme. Of miskien het jy net 'n klomp bekommernisse en spanning wat jou gedagtes oorheers en jy kan net nie 'n manier kry om hulle stil te maak nie. Al hierdie dinge kan jou laat voel asof jy elke dag 'n rots teen 'n heuwel opstoot wat weer terugrol en daar is net geen einde in sig nie.

Sulke probleme kan regtig pynlik wees. Dit kan ook uitputtend wees. Jy wens dat daar net een dag kan wees wanneer jy nie voor hierdie moeilikhede te staan hoef te kom nie, maar dit hang altyd soos 'n donker wolk oor jou kop.

Wanneer ons so voel, gee God aan ons die opdrag om dapper te bly, want ons hoef nie die stryd alleen aan te durf nie. God is by ons, altyd besig om saam met ons te werk aan watter probleme ons ook al het — gereed om ons na oorwinning te help.