Van Gebroke Na Herstel - Die Boek NehemiaVoorbeeld

Lees: Nehemia 13:1–3; Numeri 22:1–14; Rut 1:16–17; 2 Timoteus 3:16–17

SOAP: 2 Timoteus 3:16–17

"Die hele Skrif is deur God geïnspireer en het groot waarde om in die waarheid te onderrig, dwaling te bestry, verkeerdhede reg te stel en 'n regte lewenswyse te kweek, sodat die man wat in diens van God staan, volkome voorberei en toegerus sal wees vir elke goeie werk."

Oordenking

God het Israel as sy volk gekies. Hy het hulle uit slawerny gelei, deur die woestyn en in die beloofde land in. Die volk moes Syne bly en hulle mag met niemand van die nasies wat hulle omring het trou nie, veral nie die Ammoniete en Moabiete nie. Albei hierdie nasies het Israel teëgestaan terwyl hulle deur die woestyn getrek het en die Moabiete het selfs vir Bileam gehuur om Israel te vervloek.

Die doel om God se volk apart van die omliggende volke te hou was omdat God geweet het dat sy volk maklik op ‘n dwaalspoor gelei kon word en in afgodery kon verval. As ‘n Moabiet of Ammoniet egter van hul heidense weë weggedraai het en God heelhartig volg, is hulle in die volk van God verwelkom. Rut, 'n Moabiet, is ‘n uitstekende voorbeeld hiervan. Sy het weggedraai van die weë van haar mense en gekies om Naomi se God te volg. Rut was in die geslagslyn van die grootste koning van Israel en was in groot eer onder God se volk gehou weens haar getrouheid.

Dit was nie die eerste keer dat die ballinge hulle moes bekeer van hierdie spesifieke sonde nie. Hulle het ondertrou en is voorheen deur die afgode van ander nasies op ‘n dwaalspoor gebring. Nehemia 9:2 en 10:28 toon vorige gevalle waar die mense hulle bekeer en van hierdie sonde weggedraai het. Die gebeure in hoofstuk 13 het ongeveer dertig jaar later plaasgevind, wat toon dat alhoewel hulle berou gehad het, die volgende geslag weer ongehoorsaam was.

Tog was God getrou en sy Woord het mense nie onveranderd gelaat nie. Toe die mense dit gelees het, het hulle gereageer, berou gehad en van hul sondes weggedraai. Al het hulle teruggeval in ‘n patroon van sonde het God medelye met sy volk gehad. Sy Woord was effektief en het sy mense tot bekering gelei. Dieselfde geld vir ons. Selfs wanneer ons in sondige patrone verval, is God getrou en geduldig met ons. Hy sal sy Woord gebruik om ons tot bekering te roep. Soos die Jode kan ons ons bekeer en na Hom terugkeer, dit maak nie saak wat ons gedoen het nie.